اليوم الثالث والعشرون : يوم فرى .. فرى قوى

 اليوم الثالث والعشرون : يوم فى فرى .. فرى قوى 

                    النهاردة بقى اليوم الفرى بتاعى .. وبصراحة كنت فرحان بالكيلو و200 جرام اللى نزلتهم الأسبوع اللى فات .. فأكلت النهاردة اللى يخلينى أعوض الأسبوع اللى فات كله .. طبعاً الفطار النهاردة ما كانش فيه جديد بس .. جبنة وعيش برضه .. بس نوع العيش مختلف .. بس ما نسيتش أخد معلقتين حلاوة طحينية لانها كانت واحشانى قوى 

                نزلت مع نانا تمرين السباحة .. بدرى قوى .. ولما رجعت كان ميعاد الصلاة جه .. فرحت أصلى .. وبعد الصلاة رجعت البيت .. المفروض ان النهاردة ناكل بره عشان إحنا وعدنا نانا بكده بعد الأداء الكبير اللى عملته يوم الأربع اللى فات فى مسابقة المدارس للسباحة .. وعلى فكرة المدرسة ادتها شهادة تقدير وميدالية .. كانت لابساها النهاردة طول اليوم من كتر فرحتها .. المهم اننا كان لازم نخرج ناكل بره بس فى ميعاد متأخر عشان نبقى نقرب من ميعاد التمرين المسائى ..ولما جت الساعة 2 ونص تقريبا حسيت بالجوع .. لانى فاطر من بدرى .. رحت ساحب كام صباع بقسماط ونزلت على علبة الجبنة الأستامبولى بدون توقف .. وطبعاً لزوم الطعم والمزاج بقى ضربت لى طماطماية وقرن فلفل حامى .. قال يعنى تصبيرة كده 

                رحنا أكلنا .. والأكل كان تقيل شوية .. قلت الحمد لله على كده ونختمها بقى بفاكهة عشان ما نبوظش مجهود التلات أسابيع اللى فاتت كلها .. كفاية أسبوع واحد بس .. أنا رحت الشغل وهما راحوا النادى وبالليل وإحنا راجعين إفتكرت ان البيت ما فيهوش فاكهة .. فنزلت عند الفكهانى ورحت أشترى فاكهة .. بس نفسى وزتنى أنى أجيب تين .. أنا بأحب التين قوى .. صحيح شكله كان زعلان شوية عند الفكهانى ..بس قلت مش مهم .. ولما رحت البيت .. لولو زوجتى الحبيبة غسلت لى شوية .. طبعاً بعد ما إستغربت انى هاكل تين بالليل .. بس قلت لها يالا بقى يبقى يوم بوظان كله وخلاص ... بس للأسف .. كانت أسوأ مرة أكلت فيها تين فى حياتى .. من بين كل اللى غسلتهم لى .. وكان معظمهم زى البل كده .. لقيت تلاتة حمضانين .. وتلاتة من غير سكر خالص زى ما يكونوا دايت كده .. واتنين بس مسكرين .. حسيت انى أستاهل عشان الطفاسة .. ما كنت خليتها حاجة تانية وقطعت الرجيم عند كدة .. فلا منى أنبسطت ولا منى حافظت 

                على فكرة أنا مش زعلان على اللى حصل النهاردة .. أصل فيه رأى بيؤكد ان اليوم الفرى ده بيخلى الجسم يبقى مؤهل أكتر لفقد المزيد من الدهون .. فى الفترة التالية .. لاننا بنلخبطه .. فيفتكر ان مشكلة نقص السكر فى الدم اتحلت .. وانه خلاص بقى مش محتاج يقفًل على المخازن اللى جوة .. ويرخى قبضته شوية .. فيتفاجئ بالمزيد من النقص .. فما يلحقش يعالجه .. ودى نظرية .. بس كمان فيه ناس بتقول ان اللخبطة يوم الرجيم .. بتتحرق كلها أول يوم بعد اليوم الفرى .. ده طبعاً لو مافيش لخبطة تانى يوم .. وكأنها لم تكن أصلاً .. 

عموماً أهى مرة وعدت .. بس أنا أنبسطت قوى بخروجة النهاردة عشان كان ليها معنى .. صحيح النجاح حلو .. ولكل مجتهد نصيب 

عقبال عندكم جميعاً .. ألحق بقى أسيبكم عشان لو سهرت أكتر من كده ممكن أفكر فى حاجة أعوض بيها الطعم السخيف اللى فى بقى من التين المقلب .. تصبحوا على خير