طبعا دى حقيقة ما حدش يقدر ينكرها :
البدايات الجديدة دائماً جيدة
كتير مننا حاولنا .. منا اللى نجح ومنا اللى وصل لقريب من اللى هو عاوزه بس ما كملش ، ومنا اللى لسه بيحاول يبتدى ، بس المشكلة ان فيه ناس تانيين ابتدوا بس ما كملوش .. ليه ؟ .. مش عارفين .. زى حالاتى كده .
أنا لما إبتديت معاكم من زمان قوى ، كان نفسى أكون زى أبطال السينما فى بلاد بره ، أو على الأقل أبقى زى تامر هجرس مثلاً بس المشكلة ان طول الوقت شايف نفسى زى أحمد عز .. ههههه ... أقصد أحمد رزق. حاولت كتير وقربت قوى .. بس ما كملتش .. وبينى وبينكم الموضوع ده عمل لى إحباط قوى .. يعنى إيه أقعد أحرم نفسى مده طويلة من الوقت وبعدين برضه ما أخسش للدرجة اللى أنا عاوزها. وليه ما بأوصلش رغم إنى كمان محافظ على نظام رياضى يساعد فى خسارة الوزن.
الحقيقة احترت كتير قوى فى التفكير فى الموضوع ده . وحيرتى دى ضيعتنى وضيعت منى وقت كتير كان ممكن أستغله بشكل أفضل . بعدت عن المدونة وعن صفحة الفيسبوك ، وما أكدبش عليكم بعدت كمان عن الريجيم وكان نتيجة ده انى تخنت أكتر من قبل ما أبتدى الرجيم اللى كلكم تابعتوه معايا من أول يوم . جالى إحباط كبير قوى ، وما كنتش عاوز حتى أخرج من الإحباط ده بسبب عدد كبير من مشاكلى الشخصية مفيش مجال أحكى لكم عليها وأوجع راسكم بيها. رغم انها كان ليها أكبر الأثر فى عدم إقبالى على الحياة بشكل عام لفترة كبيرة قوى من الوقت . والمشكلة الكبيرة ان الواحد لما رجليه بتتزحلق فى سكة الإحباط دى ، ما بيقدرش يقف إلا بعد لما بيكون خسر كتير قوى. بس فضل جوايا تساؤل مهم قوى .. هو أنا ليه ما كنتش بأخس ؟ وهل فيه أمل ييجى يوم أكون فيه بالشكل اللى بأحبه ؟ وليه فيه ناس كتير أعرفهم - وبأحسدهم بالمناسبة - بياكلوا أكتر منى ومش بيبان عليه خالص ؟
الإختلاف .. سيد الأدلة
الحقيقة إكتشفت حاجة مهمة قوى ، ان ربنا خلقنا علشان نكون مختلفين ، ما ينفعش كلنا نبقى تامر هجرس ولا أحمد عز ولا حتى أحمد رزق . كل واحد منا له خصوصية خاصة جداً .. وده له أساس علمى على فكرة . لان العلم أثبت ان العامل الأساسى فى حجم الجسم واللى بيفرق واحد تخين من واحد رفيع هو نسبة حرق الدهون فى الجسم .. او بمعنى تانى قدرة الجسم على حرق الدهون لان كل واحد مننا جسمه بيحرق الدهون بطريقته الخاصة . حتى لو أكلنا كلنا نفس الأكل و لو عملنا نفس المجهود . تفضل قدرة الجسم على الحرق هى العامل الفيصل فى الموضوع . ودى طبيعة فينا ،ومش ثابتة برضه على فكرة ، يعنى بتختلف كمان من سن لسن ومن وقت لوقت .
فكرت كتير فى الموضوع ده ؟ طب ما أسيب نفسى لطبيعتها بقى طالما هى كده كده مش هاوصل للى أنا عاوزه ؟ وما أخبيش عليكم برضه عملت كده . وقعدت فترة كبيرة جداً من الوقت فى الحالة دى لحد ما لقيت نفسى مش بأثبت ، والميزان عمال يطلع و كمان الصحة عمالة تتأثر . طب إيه الحل فى المشكلة دى ؟
رجعت لأصل الموضوع . هو أنا ليه أصلا عاوز أخس ؟ كانت إجابتى علشان أقدر أحب نفسى. وهى دى الإجابة الحقيقية لانى فى الحقيقة من كتر إنتقاد اللى حواليا ليا كنت بدأت أكره نفسى وكنت عاوز اثبت لهم كلهم انى أقدر أكون شخصية تانية ؟ علشان بس أنال إعجابهم .
لما دورت على الأسباب ولقيت الحكاية كده حطيت إيدى على مفتاح الحل: والمفتاح ببساطة اننا لازم نؤمن بإختلافنا . بس فى نفس الوقت لازم نحب نفسنا بإختلافنا ده . لازم تحب نفسك علشان هى دى نفسك بتاعتك ـ مش بتاعة حد تانى ومش هاتلاقى بديل ليها خالص حتى لو دورت . وماينفعش تحاول تحقق نفسك فى حد تانى ولا تخلى حد تانى يحقق نفسه من خلالك .
كبير شوية الكلام ده .. معلش أقوله بطريقة تانية .. ماينفعش تبقى حلو علشان الناس عايزينك حلو . المفروض تبقى حلو علشان انت أصلا حلو.يعنى لو أمنت انك كويس على ما أنت عليه ؟ وانك حقيقى إنسان كامل زى ما ربنا خلقك وان مافيش حد له حق خالص فى إنتقادك او التعليق عليك ولو حتى من باب الهزار لانك بتحب نفسك مش هاتسيب حد يأثر فيك .
ساعتها الريجيم والمشى على نظام غذائى ورياضى هايكون ليهم هدف تانى . والهدف المرة دى هايكون انك تحافظ على النعمة اللى ربنا إدهالك .. تحافظ على نفسك من المرض اللى ممكن يبقى نتيجة حتمية لكثرة الدهون وثقل الوزن . بس من غير ما تكون عاوز تبقى زى أحمد عز أو تامر هجرس علشان تعجب حد . انت بتعمل ده لنفسك .
نرجع تانى بقى لجملة البداية : البدايات الجديدة دائما جيدة .. اعتبر ان حبك لنفسك بداية جديدة . تحاول فيها انك تراجع كل تصرفاتك فى حق نفسك الفترة اللى فاتت وأسباب التصرفات دى . وإيه الحاجات اللى ممكن تعملها علشان تصلح اللى فات وتقدر تعيش اللى جاى بشكل أفضل . وماتتوقعش كتير . لان الموضوع بياخد مجهود بس الأهم .. انك تعيش دلوقتى كويس. من غير ما تقلق من بكره ومن غير ما تفرط فيه .
أنا عن نفسى قررت انى أحب نفسى أكتر من الأول. وعلشان كده بأستفيد من السنة الجديدة والبداية الجديدة علشان أبدأ رحلة جديدة مع الريجيم. بس المرة دى مش علشان أبقى زى حد ولا علشان أعجب أى حد . ولا خوف من إنتقاد أى حد. لكن علشان أنا بأحب نفسى اللى ربنا إدهالى زى ماهى. وناوى أحافظ عليها لاطول وقت ممكن. والله لو خسيت وبقيت أحسن وشكلى زى أحمد عز .. هايكون كوول قوى . بس لو ما حصلش مش هازعل ولا هاستنى ده. ولما أشوف السنة الجديدة دى هاقدر أحافظ فيها على نفسى اللى بأحبها ولا لأ.
وأنا بأدعوكم كلكم تشاركونى فى رحلتى. تحبوا نفسكم وتعملوا علشان خيرها. وتحافظوا عليها أكتر وقت ممكن وبكل الطرق لانه من غير ما تحب نفسك بجد ، مش هاتقدر تحب حد ومش هاتقدر تساعد حد . ما تخلوش كلام الناس يأثر فينا ، يالا نبتدى مع السنة الجديدة بداية جديدة ويارب كل واحد السنة دى يحقق كل اللى بيحلم بيه
كل سنة وانت طيبين
