اليوم الثلاثون : النكسة

اليوم الثلاثون : النكسة

      بصوا بقى .. النهاردة يوم فاشل جداً بالنسبة لى .. أصلى كان نفسى أصلح حاجة .. فعلى ما يبدو بوظت حاجات أكتر .. مش هاقدر أقول غير انى زعلان قوى ان اليوم النهاردة رجعنى خطوات كتير قوى لورا .. مش عشان حاجة غير انى كان نفسى أكمل الشهر من غير لخبطة كتير قوى 

طبعاً انتوا عارفين اللى حصل امبارح فى السحور ..لما حبيت اكافئ نفسى عشان كملت شهر فى الرجيم فقررت ان بدل ما عندى يوم فرى (وهو الجمعة زى كل أسبوع ) قررت اعمل الفرى فى السحور وضربت طبق المكرونة بالسمنة المحترم ومعاه شوكلاتاية كيت كات بيضا اياها .. وقلت خلاص بقى جبرت على كده وبكره أكمل الرجيم عادى 

بس اللى حصل مش كده .. ومش هاقول لكم أكتر انى لخبطت قوى النهاردة .. قوى يعنى .. على الفطار .. وكملت اللخبطة لما رجعت على غير أرادة منى .. أو بمعنى أصح من غير ما أخد بالى .. أو من غير ما أهتم .. بصوا بقى أنا ضميرى مأنبنى جداً .. وجوايا جرس كبير قوى بيقول لى انت ماشى غلط ..

  سامحونى مش هأقدر أكتب أكتر من كده النهاردة عشان أنا فى حالة غضب من نفسى وإحباط .. ولو ما كنتش أثبت لنفسى انى أقدر أكمل الرجيم .. هازعل من نفسى قوى .. عموما حصل خير والمهم ادعوا لى أجتاز المرحلة دى على خير 

هى ابتدت الأسبوع اللى فات بشوية تمرد .. وبعدين حبه لخبطة على خفيف وختمت بقى النهاردة بالإستغراق فى اللخبطة .. ربنا يستر والدور ده يتلم على خير خلينا نكمل بقى .. ابتدت معايا بخداع استراتيجى .. وبعدين الثغرة .. وأهى قلبت نكسة أهيه .. لو ما كانتش حرب الإستنزاف تلحقنى .. المواضيع هاتبوظ منى خالص .. وربنا يستر

تصبحوا على خير

اليوم التاسع والعشرون : قياسات قياسية .. قياستكم

اليوم التاسع والعشرون : قياسات قياسية .. قياستكم 

    

              النهاردة .. طبعاً يوم القياس .. بس النهاردة كمان تانى يوم صيام .. امبارح بالليل اتسحرت جامد حبتين .. بصراحة كنت جعان وخفت أجوع وقلت أجرب .. بس لو جينا للحق .. مفروض الواحد ياكل كويس فى السحور لو كان قريب من الفجر .. عملاً بقول الرسول الكريم عن أفضلية تأخير السحور .. لان الجسم هايبتدى يحرق مع بداية اليوم .. وده يستلزم برضه ان الواحد لما ياكل يفضل صاحى .. مش يضرب الضربة الجامدة ويقول هى كده كده هاتتحرق .. لان الجسم بتكون قابليته للحرق طبعا ً أكبر الصبح .. بينما بتقف تماما تقريباً بالليل .. والمجهود هو اللى بيحدد يحرق أو ما يحرقش بينما الوقت هو اللى بيقول يحرق قد إيه .

وعشان كده أنا ناوى انى أحاول أأخر السحور على قد ما أقدر .. وبرضه ما أضربش فيه جامد قوى يعنى عشان ما أتعبش زى النهاردة بس ما أوعدكوش افضل صاحى بعد منه ..لانى بأضطر أنام متأخر كل ليلة عشان بأرجع متأخر من الشغل .. ولازم أرتاح شوية 

بس النهاردة ما حسيتش بالصيام .. ما هى دى ميزة الصيام فى الوقت ده من السنة .. لا جوع ولا عطش .. هو بس النسكافيه اللى واحشنى قوى قوى .. هو المشكلة .. بس مع الوقت ويوم بعد يوم الجسم بيتعود ..

النهاردة بقى فطرت تونة .. وجبت طبق سلاطة بلدى كبير من كافتيريا التليفزيون و حطيت عليه علبتين تونة دايت .. وضربته .. صحيح كان ناقص ملح شويتين .. وكان طعمه بارد وغلس .. بس شبعنى جداً وبيتهيألى انه كان وجبة مفيدة بكل المقاييس .. وما أكلتش حاجة تانية معاه غير رغيف عيش بلدى صغير عشان أقدر أبلع بس .. وبعد الفطار ما أخذتش حاجة تانية لغاية ما اتسحرت من شوية .. طبعاً هاتستغربوا ..من شوية ؟ .. أه من شوية .. أصل الليله دى هى الليلة الفرى .. حيث ان بكره برضه صيام ومش هاعرف اتمتع بالأكل زى كل أسبوع .. وعشان كده اتسحرت قل شوية صغيرين .. 

اما بقى اتسحرت إيه فدى ليها حكاية تانية تبتدى من أن النهاردة يوم القياس .. رحت زى عادتى كل أسبوع عشان أقيس نفسى فى نفس الصيدلية وعلى نفس الميزان .. وفرحت قوى لما عرفت انى نزلت النهاردة كيلو و300 جرام عن الأسبوع اللى فات .. صحيح كان فيه حاجات فى القياس مش فاهمها .. بس برضه فرحت .. يعنى مثلا أزاى أكون خسيت كيلو و300 جرام وأكون زدت فى الدهون حوالى نص كيلو جرام عن الشهر اللى فات .. طب إيه اللى نقص .. مصيبة لاتكون عضلاتى هى اللى نقصت .. والله يمكن .. اصل الأسبوع ده كان عندى شغل كتير قوى و كنت بأشتغل دايما وأنا قاعد مكانى يعنى كانت حركتى قليلة .. رغم ان ألم رجليا أخف .. وبقيت أقدر أمشى دلوقتى طبيعى أكتر من الأول .. عموما أنا ناوى بعد العيد أبتدى برنامج رياضى جامد .. هابقى أحكى لكم عليه بعدين .. وواثق انه هايفرق معايا جدا إن شاء الله .. بس بالنسبة للنهاردة فأنا  فرحت قوى بالنتايج رغم انى مش عارف أحللها قوى لكنى قررت محتاج للإحتفال وانى محتاج بقى أكل حاجة أحس معاها بالمكافأة .. وأعتبر الأكله دى هى اليوم الفرى بتاعى ..  

عارفين أكلت إيه ؟؟  .. بيتهيألى فيه منكم ناس ممكن تكون عارفة .. أكلت مكرونة .. سباجتى مسلوقة .. وعليها رشه ملح وفلفل .. وسمنه .. الله الله الله الله .. والله كانت واحشانى جداااااااً ...

بس ما أكتفيتش بكده بس .. دا انا كمان ضربت شوكولاتاية كيت كات بيضا .. يا خبر أبيض على الحلاوة والجمال .. 

والله تحفة .. على فكرة مش بأعمل دعاية بس أنا فعلا بأحبها جداً .. وبأحب الشوكولاتة البيضا تحديدا أيا كان نوعها .. ويالا بقى أهى حاجة تفرح الواحد شوية .. ومن دلوقتى بقى يبتدى الدايت تانى لاخر الأسبوع .. 

ربنا يقوينا .. ودلوقتى تصبحوا على خير 

اليوم الثامن والعشرون :أول يوم صيام فى الرجيم

اليوم الثامن والعشرون : أول يوم صيام فى الرجيم

مساء الخير عليكوا .. عاملين إيه ؟

          كل سنة وانتم طيبين .. ياترى حد منكم صام النهاردة .. او امبارح بقى ؟؟ ومين هايكمل ومين هايبطل ؟؟ واخترتم إيه من أنظمة الرجيم ؟؟ ياترى حاجة من اللى أنا قلت لكم عليها ؟؟ ياريت أسمع منكم .. 

طبعا انتوا عاوزين تعرفوا أنا عملت إيه النهاردة .. مش كده ؟ .. ولا إيه ؟؟ عموماً اللى عاوز يعرف يكمل معايا .. واللى مش عاوز ..يقفل المدونة ويروح يعمل كوباية موز باللبن كبيرة .. وممكن يحط عليها فراولايتين .. هاتبقى جنان .. بلا رجيم بلا قلبة مخ ياعم .. 

بس بالنسبة للى عاوزين يعرفوا هاقول لهم بأختصار 

            امبارح راحت عليا نومة .. ظبط المنبه عشان أقوم اتسحر بعد المقالة العنترية اللى كتبتها امبارح عن اهمية السحور وانه أهم وجبه وما إلى ذلك .. بس نمت .. ماقدرتش أصحى .. وعشان كده صمت من غير سحور .. كانت أخر حاجة أكلتها امبارح كانت تفاحة .. وفضلت على كده طول اليوم 

 رحت طبعاً الشغل واتفاجئت انهم لاول مرة من مدة طويلة يبعتوا يجيبوا فطار لكل المكتب مع بعض .. وأنا كنت الوحيد اللى صايم النهاردة .. ما حسيتش بالجوع ولا بالعطش قد ما كنت حاسس انى مش موزون قوى عشان غياب المنبهات واهمها مج النسكافيه حبيبى بتاع كل يوم الصبح ده .. بس صمدت .. وحاولت أنى أركز فى الشغل اللى كان كتير قوى النهاردة بس كنت حاسس ان إيقاعى بطئ جداً 

بس كملت .. وجه ميعاد الفطار وكنت ساعتها فى النادى مع نانا .. رحت ساعتها أجيب لها عصير .. وجبت لنفسى عصير رمان .. سمعت كتير قوى عن فوايده .. بس كنت حاسس انى محتاج له النهاردة .. وكان عندى حق .. تصدقوا ان طلع له فوايد كتير قوى منها علاج الضغط العالى و تقوية الشرايين والعمل على مرونته وليونتها و تنشيط عضلة القلب وتطهير المعدة والأمعاء من الفطريات والجراثيم وبيساعد فى منع تكون الدهون فى منطقة الكرش (ودى حاجة مهمة قوى ليا ) وليه كمان دور كبير فى تحسين الصحة الجنسية ده غير انه فيه عدد كبير جداً من الفيتامينات والأملاح الهامة .. 

صدقونى لما شربته حسيت بالشبع .. وعلى بال ما رحت التليفزيون كان فات وقت طويل شويتين وكانت الكافتيريا خلصت فطبعاً بعت أجيب من بره .. ووقع الإختيارالنهاردة على على عيد .. فاكرينه .. جبت من عنده نص فرخة مشوية .. وطلبت معاها كيس شيبسى بس ما أكلتش منه حاجة تقريباً .. وما أكلتش غير رغيف واحد بس من التلاتة اللى كانوا مع الفراخ .. وأنا بصراحة مبسوط من نفسى جداً على المقاومة دى .. حسيت ان الهبل اللى عملته امبارح قابل للعلاج .. وربنا يسهل بقى وأصمد 

 لما رجعت البيت أخذت كام بلحة سمانى كده .. واخدتهم كسناك .. وكمان شوية وهاقوم أجهز السحور اللى غالباً هايبقى فول وبيض وجبنة وزبادى .. عشان أصمد بقية اليوم بقى .. وكده أبقى ماشى صح ان شاء الله 

نسيت أقول لكم ان النهاردة تميت 28 يوم بالظبط .. طبعاً أخذتم بالكم من العنوان .. مش كده ؟؟ بس ده معناه ان عدى شهر عليا فى موضوع الرجيم .. أربع أسابيع .. صحيح بكرة القياس .. ومش متفائل المرة دى عشان الهبل بتاع امبارح .. بس مش مشكلة .. النتيجة لغاية دلوقتى مبشرة ومريحة .. وباسطانى .. وياريت أقدر أكمل وأوصل للهدف .. يارب .. أسيبكم بقى عشان أقوم أحضر السحور

اليوم السابع والعشرون :الثغرة

اليوم السابع والعشرون :الثغرة

             طبعاً كل اللى هايقرا اللى أنا كاتبه ده هايفتكر ان أجواء أكتوبرية سيطرت عليا .. وان من وحى مصطلحات الشهر بقى امبارح أقول لكم خداع استراتيجى والنهاردة أقول الثغرة .. كده شكلى رامى على تلاتة وسبعيناتى .. بس الحقيقة مش كده .. وان كانت فيها جزء حقيقى وهو ان الخداع الإستراتيجى اللى أنا عملته امبارح .. طلعت أنا ضحيته .. ووقعت النهاردة فى ثغرته .. 

           طبعا انتم عارفين انى استهبلت شويتين امبارح فى الفطار زى ما حكيت لكم .. بس قلت مفيش مشكلة وأهى وجبة وتعدى .. المشكلة بقى فى التأمر والتمرد اللى قلت لكم عليه من أول الأسبوع .. وكانت ريحته باينة شويتين .. النهاردة بقى وقعت فى فخ قلة النوم مع الجوع .. وده زى ما شرحنا قبل كده بيخلى حكم الواحد ع الأمور مش مظبوط .. علشان كانت نانا عندها التدريب النهاردة الصبح بدرى .. فقمت من النوم بعد 4 ساعات بس ع الشارع على طول الساعة 5:30 الصبح .. كان الفجر لسه يا دوب مأذن .. ونزلت م البيت من غير فطار طبعا .. ليه .. ما عنديش رد .. يمكن كنت مستعجل شويتين .. المهم انى لما البنت خرجت وراحت مدرستها أخذت بعضى ورحت على بيت أمى فى السيدة زينب وده عشان أكون قريب من الشغل وما اضطرش أنزل تانى م البيت .. واخذت لهم فطار معايا من على العربية .. العربية تانى .. الظاهر انى مدمن فول العربيات .. بس والله بيبقى طعمه مختلف .. وطبعاً أكلت وما حسيتش انا أكلت قد إيه من كتر التعب وقلة النوم .. تقريباً مراكز الشبع عندى كانت عطلانة شويتين .. 

 وكمان مراكز الجوع كانت عطلانة .. والدليل على كده انى رغم انى فطرت الساعة 8 الصبح تقريباً .. فضلت لغاية الساعة 6 من غير حتى ثمرة فاكهة .. ولاحسيت بالجوع غير لما رحت التليفزيون واتكلموا عن الأكل 

الصراحة انا كان عندى أستعداد أكمل اليوم دايت .. بس كلهم اتفقوا ياكلوا سمك .. وبالتحديد سندوتشات .. طب أعمل أنا إيه بقى .. ما رضيتش أكل معاهم واختارت أنى أكل وجبه .. على الأقل الرز ممكن السيطرة على كميته وضرره أقل 

وحاولت برضه فى الظروف دى أطلب حاجة دايت .. سألت لو كان فيه فيليه مشوى .. ضحكوا عليا .. مع أن فيه محلات كتير بقت بتعمله ..بس المحل ده ما كانش عنده فأتورطت فى وجبة السمك 

وطبعاً ليكوا تتصوروا لما تكون الوجبة فيها عيش (طبعا ما أكلتوش) ورز وسمك وجمبرى وسلطة وتكون بـ15 جنيه .. تفتكروا ممكن تكون حقيقية .. أنا كنت حاسس انى بأكل حاجة شبه السمك والجمبرى .. ومقليين .. ومش عاوز أقول لكم ان هى دى الحاجة الوحيدة اللى كانت صح فى الموضوع .. قصدى انهم قلوهم بذمة جامدة .. كانوا بيشروا زيت

طبعا حد هايسألنى : طب ليه ياكابتن علاء ما أخذتش سمك مشوى ؟ هاقول له بصراحة أكل السمك المشوى مش مكانه فى الشغل .. فى الشغل بصراحة انسب حاجة هى السندوتشات عشان تاكل وتجرى .. بس السمك المشوى بقى عاوز قعدة وتفصيص وتمحيص .. وبعدين يجى تلاتين مرة غسيل إيدين بعد كده ..وبرضه بتفضل الريحة فى إيديك 

  والحقيقة ان من الحاجات اللى مضايقانى بجد انى ما أنبسطش خالص .. واتحسبت عليا أكلة ملخبطة .. وكده يبقى اليوم ده سقط من الحسابات وبمعنى أخر تقييمه سلبى جداً .. 

الحاجة اللى ريحتنى النهاردة وفرحت قلبى شوية لما قابلت صديقى العزيز و زميل مشوار الدايتاوية الطويل .. اسماعيل بيومى .. وقال لى ان أصمد .. وأستمر و أنه سيشاركنى عما قليل - حلوة عما قليل دى ؟؟ - ده ادانى دفعة انى أكمل وما أيأسش وما أضعفش .. وعشان كده أنا نويت انى أكل تفاحة بس فى العشا .. 

 

اه .. نسيت أقول لكم كل سنة وانتم طيبين .. عشان النهاردة أول ليلة من الليالى البيض .. وعشان كده أنا هاتسحر قبل الفجر مباشرة عشان يبقى كأنه فطار يعنى .. والفطار هاتعامل معاه على أنه غدا .. وأطبق عليهم المقولة الذهبية بس بتصريف 

 

اتسحر سحور الملوك .. وافطر فطار الأمراء .. وبين الإتنين أعمل ميت .. لأ لأ .. خد تفاحة  

وماتنسوش شرب المية الكتير فى الصيام .. عشان الجسم بيحتاجها بجد .. وربنا يتقبل

اليوم السادس والعشرون : خداع إستراتيجى

اليوم السادس والعشرون : خداع إستراتيجى

             النهاردة قررت أطبق خطة خداع استراتيجى من خطط الرجيم .. طبعا كلكوا عارفينها عشان أنا قلت لكم عليها قبل كده .. وهى ببساطة .. تحاور جسمك بالرجيم زى ما بتحاور الخصم بالكورة .. طبعاً انتوا فاكرين امبارح (اللى قرا يعنى ) ان اليوم كان أبيض .. بدأ بجبنة قريش وكان الغدا برضه جبنة قريش أما العشا فكان جوافة .. لما حسيت ان الدنيا بقت بلاك أند وايت زى أفلام زمان .. بالمناسبة مين كان متخيل ان أهل زمان كانت حياتهم من غير ألوان ؟؟ زى الأفلام يعنى ؟؟ والله أنا عن نفسى كنت مصدق لغاية ما فكرت فى الموضوع 

            الموضوع بتاعنا بقى انى عرفت ان الجبنة القريش مهمة فى الرجيم بالذات عشان بتساعد الجسم فى حرق الدهون أكتر من غيرها .. وعشان كده مفيدة ولك دكاترة الرجيم بينصحوا بيها .. ولان ده كان فيه ضغط كبير على جسمى .. فعلماء الريجيمات بيقولوا لنا اننا نعمل خطة خداع .. وده اللى أنا عملته النهاردة 

ضربت طبق فول بالزبدة فى الفطار ومعاه قرص طعمية واحد و شوية طماطم وفلفل .. اه نسيت .. وكمان كام بصلة خضرا وده عشان جسمى يطمن ان الإمدادات الطبيعية موجودة ولا خوف من استهلاك المخزون .. فالتعويض قائم 

والله اللى بأقوله لكم ده حقيقى جدا .. ودى استراتيجية ربنا وضعها فينا عشان ما نموتش م الجوع بسرعة .. فالجسم مجرد ما يحس ان فيه استهلاك زائد من أى عنصر من عناصره يبتدى يعمل كنترول جامد على السحب منه .. وده لحين التعويض وعشان كده فيه بعض الناس بتمشى على الرجيم و ما تنزلش خالص علشان الجسم بيكون قفل على العناصر دى .. فما يخسوش وعشان كده الدكاترة بيوصوا باليوم الفرى .. لانه هام جداً عشان الجسم يكمل الرجيم على خير 

بس مش معنى انى عملت كده انى لخبطت بقية اليوم .. أبداً والله .. أنا ضربت  فى الغدا علبة تونة .. وأول مرة كمان أجيبها دايت .. كنت بأجيبها قبل كده بزيتها وكل حاجة وبعدين اصفيها ..بس المرة دى كانت مافيهاش زيت خالص .. عشان دايت .. كانت حلوة حقيقى بس مشكلتها انها كانت مش بتتبلغ .. وتخيل بقى لما يكون معاك كمان عيش سن طرى .. صباح النشفان ..زى بالظبط مشهد الشبة فى فيلم 30 يوم فى السجن .. 

 

لكن العشا بقى كان فيه لخبطة كده على خفيف .. أخذت أربع بلحات ... بس اطمنوا بس .. مش بلح أمهات ولا من أنواع بلح رمضان خالص .. انما بلح سمانى من الاصفر ده اللى شبه الزغلول .. انا والله بأحبة قوى بس هو مش مضر قوى بيتهيألى .. عشان نسبة السكر فيه أقل من أى نوع تانى من البلح .. على الأقل السنة دى ومعايا .. يالا بقى .. مش مهم .. ما هو كله عشان الجسم يتعود وما يتعودش .. 

 

 

الحمد لله فيه ناس النهاردة كان بقى لى كتير ما شفتهمش رفعوا معنوياتى لما اندهشوا انى خسيت .. انبسطت قوى بس اللى بسطنى أكتر انهم كانوا مهتمين باللى بأكتبه فى المدونة .. وعلى فكرة لولا المدونة أنا لا كنت كتبت ولا حتى فكرت .. والأول والأخر .. النجاح والشكر ليكم  أنت لانى لولا التزامى بالكتابة كل يوم .. يمكن ما كنتش كملت الرجيم أصلاً .. تصبحوا على خير

اليوم الخامس واالعشرون : اليوم الأبيض ..

اليوم الخامس واالعشرون : اليوم الأبيض ..

ربنا يجعل كل أيامنا بيضا يارب .. بس هو مش أبيض زى ما دماغكم راحت .. هو أبيض بسبب حاجة تانية .. وهى طبعا ً الجبنة القريش 

أيوة .. الجبنة القريش .. ذلك المنتج الأبيض الماسخ .. الغلس

                اشتريتها من كام يوم بس ما جتليش الشجاعة انى أفكر أكل منها .. وأول امبارح وأنا بأشترى الطماطم من السوق بعد الصلاة .. جبت معايا شوية جرجير بلدى .. وقلت النهاردة بقى هاضرب منها .. وبالفعل عملت طبق محترم الصبح .. جبنة قريش وشوية طماطم وفلفل حامى وخرطت عليها كام عود جرجير ورشيت شوية ريحان و نقطتين زيت .. وقلبت ده كله وضربت منها رغيفين سين طرى .. 

الحق لله شبعت ع الاخر .. نزلت هى والعيش وكتمت .. ما حسيتش بالجوع إلا على الساعة 3 بعد الظهر كده .. وساعتها بقى رحت ضارب رغيفين تانيين من نفس العينة يامعلم .. والعيش السن مع المية المعدنية بقى عملوا أحلى واجب ش.. شبع تمام .. بس هو شبع أقرب لسدة النفس .. 

بصراحة هما أكل مفيد جداً .. والجبنة القريش بتلاقى دايماً اللى بيدافع عنها .. بس قليلين هما اللى بيحبوها بجد .. كله بياكلها عشان فوايدها .. خفيفة و مغذية وبتساعد على الهضم .. بس هى غلسة قوى 

أصلك لازم تاكلها باردة .. وعليها السلاطة الساقعة .. ممكن تبقى حلوة فى الصيف مثلا ع العشا .. بس فى الغدا .. وخصوصاً فى الشتا .. غالبا .. ما بتبقاش أول أختيار .. ولاحتى التالت .. 

طبعا حد هايسألنى .. لما أنت مش بتحبها قوى كده .. أكلت منها ليه .؟؟  

          بصراحة .. مش عارف .. بس أنا قررت انى النهاردة ما أعكش خالص .. لا بره البيت و لا جوة .. ولما كانت عندى حالة من التمرد على كل الأكل القديم .. حبيت أنى أكل حاجة تشبعنى قوى .. وكمان ما تبوظش الدنيا .. وعشان كده .. مديت إيدى عليها أنقذها من برد التلاجة اللى صعبت عليا فيها 

طب ليه الغدا؟ .. عشان نفس السبب .. والموضوع ده فكرنى بجدى الله يرحمه .. امى قالت لى ان لما كان حد من إخواتها بيعترض على صنف من أصناف الأكل .. يفضل البيت كله ياكل نفس الصنف لمدة أسبوع كامل .. كل يوم .. ما حدش يعترض على حاجة مفيدة .. وعشان كده حبيت النهاردة أربى نفسى عشان ما أعترضش عليها تانى

بس مش هو ده بس سبب ما سميت اليوم باليوم الأبيض .. أصل العشا كمان جوافة .. شفتم يوم باهت ازاى .. ييجوا بقى اللى بيتكلموا عن ألوان الأكل الأربعة فى كل وجبة .. وده موضوع بالمناسبة هانبقى نتكلم عنه بعدين 

ملحوظة هامة

          عاوز أفكركم وأفكر نفسى ان بكره ممكن يبقى أخر يوم فى شهر ذو القعدة .. يعنى الناس اللى ناويين يصوموا الأيام البيض يستعدوا من يوم التلات كده ممكن يبتدى الصيام .. وعلشان كده أنا هادور لنا على نظام غذائى فى الصيام ما يبوظش الدايت  ولو حد عارف واحد يدلنى عليه لو سمحتم .. 

تصبحوا بقى على خير بدل ما أفكر أكل حتة الشوكولاتة الى مستخبية فى زنقور فى التلاجة .. عشان يفضل اليوم أبيض فى أبيض

اليوم الرابع والعشرون : المعسلة قوى يا بطاطا

اليوم الرابع والعشرون : يا معسلة قوى يابطاطا

             النهاردة أول يوم فى الأسبوع الجديد .. مبتدى اليوم النهاردة بنبرة تمرد واضحة شوية .. والزن بدأ يزيد شوية النهاردة .. وأعتقد ان ده مؤشر طبيعى جداً على بداية حرق الدهون الداخلية للجسم .. وده اللى بيخلى الجسم فى حالة إستنفار شديد لتعويض ذلك النقص .. بس اطمنوا .. انا لسه بأقاوم .. وبأحاول 

اول ما صحيت النهاردة صحيت على مج النسكافيه .. وبصراحة أخدت معاه  واحدة منين بالعجوة .. واحدة بس وصغيرة قوى .. وده علشان كان عندى شغل كتير قوى لازم أخلصه وأبعته بالميل بسرعة ... قبل ما أنزل للمونتاج .. اشتغلت تحت ضغط شديد قوى .. وقامت لميا ..ربنا يكرمها يارب .. وعملت لى سندوتش جبنة شيدر فى عيش سن .. وده كان فطارى النهاردة .. خلصت شغلى وبدأت فى الإستعداد للنزول .. وقبل ما أنزل بالظبط لقيت بطاطا مشوية فى المطبخ .. أسيبها ؟؟ طبعاً لأ .. أخذت لى 2 صغيرين فى طبق .. عشان أنأنأ فيهم قبل ما أنزل .. بدل ثمرة الفاكهة اللى بعد الفطار يعنى ..

بس ما أخبيش عليكم فضلت طول اليوم أسأل نفسى .. هو أنا كده لخبطت قوى يعنى .. يعنى أكمل تبويظ اليوم ولا لسه فيه أمل؟ .. بس مارضيتش أبوظ حاجة تانية فى اليوم .. وشربت مية كتييرر قوى .. واكتفيت بالقهوة والشاى بس عشان اقدر أصمد فى المونتاج .. بس لما قرصنى الجوع قوى .. طلبت طلب كفتة من كافتيريا التليفزيون .. كان نفسى يجيبوا معاها خضار سوتيه بس للأسف ما بيعملوش خضار سوتيه يوم الحد .. ليه ؟؟ مش عارف طبعاً .. ولو حد فيكم يقدر يفهمنى أكون شاكر .. الظاهر انه عيب مثلاً ؟؟ بس مش عيب يجيبوا معاها بطاطس محمرة ويضعفوا عزيمة الناس اللى زيي ..بصراحة أخدت منها كام صباع .. عشان كان صعبان عليا تترمى

لما رجعت البيت قعدت أفكر فى البطاطا تانى ..فقمت بسرعة عملت بحث عليها عشان أعرف فوايدها وعيوبها .. بس لقيت عنها معلومات كويسة قوى 

أولاً البطاطا الحلوة .. غير البطاطس خالص .. طلعوا مش من نفس الفصيلة .. وده رغم ان عدد من المواقع على النت مش بتفرق ما بينهم فى التسمية .. ودى عادة بتكون مواقع مش مصرية .. وعشان كده .. بهتت مشاكل البطاطس على البطاطا وادتها سمعة سيئة .. بينما هى فى الحقيقة .. مظلومة 

ثانياً البطاطا الحلوة طلعت مصدر هام لعدد كبير جداً من فيتامينات إيه وسي وبى 6 إلى جانب غناها بالبوتاسيوم والألياف وده بيخليها أكل سهل الهضم وبيساعد على تخفيف  أعراض قرحة المعدة والتهاب الكولون ومعالجة التشنج والغثيان بالإضافة إلى دورها في تقليل مشكلات الدورة الدموية وتطهير الجسم من رواسب المعادن الثقيلة زى الرصاص والنحاس والزئبق. 

مش بس كده ..ده ثبت ان البطاطا من أفضل الأغذية للى بيشتكوا من قلوبهم .. مش قصدى الحبيبة طبعاً .. اقصد أهالينا المرضى .. ربنا يشيل عن الجميع .. لان البطاطا مفيش فيها دهون خالص وعشان كده أمان لكل الناس اللى بيشتكوا من مشاكل فى القلب .. لايمكن هاتضرهم .. لا وكمان بيقولوا ان الألياف بتاعتها بتساعد على تخليص الجسم من الكوليسترول الضار والزائد  .. لا وكمان بيقولوا ان ارتفاع نسبة البوتاسيوم فيها مع غياب الصوديم تماما منها بيساعد على الحفاظ على مرونة الأوعية الدموية ويقلل من خطر ضغط الدم .. 

أما أهالينا الكبار .. فالبطاطا بالنسبة لهم نبع الشباب الدائم .. وده لانها ماليانة بعنصر اسمه الكاروتين بيتا اللى بيعتبر من أهم العوامل المساعدة فى حماية البشرة من أشعة الشمس وتأخير مظاهر الشيخوخة وترميم الجلد وعلاج التصبغات الجلدية اللى بتصيب كبار السن في مناطق الوجه والرقبة والصدر وعلى ظاهر الكفين وكمان بتساعد في تنشيط عملية امتصاص الحديد في الجسم والتخفيف إلى حد كبير من أعراض الروماتيزم والتهاب المفاصل.

 ياه .. قد كده البطاطا مفيدة ؟؟

 بس طبعا هى كمان فيها نسبة كبيرة من الكاربوهيدرات .. يعنى مصدر طاقة كبير بالنسبة للجسم .. ونسبة الكاربوهيدات فيها بتوصل لحوالى 23% من وزنها .. وده طبيعى .. بس ما يقلقش .. وهاقول لكم ليه بس خدوا المعلومة اللى جاية دى الإول 

 "الدراسات الحديثة أثبتت أن السكريات الموجودة في البطاطا الحلوة وأهمها سكر الأنولين هي من العناصر غير الضارة بمرضى السكري بل أنها علاوة على ذلك تعد من المكونات الضرورية في مختلف الحميات السكرية لذلك يمكن لهؤلاء المرضى تناولها بأمان."

 يعنى البطاطا غذاء آمن لمرضى السكر .. يبقى أكيد ها تكون برضه غذاء آمن للى بيعملوا رجيم زى حالاتى .. 

المهم .. ودى الحاجة اللى بيؤكد عليها كل الخبراء .. ان أفضل طرق عمل البطاطا وتجهيزها هو أما بالسلق أو بالشوى فى الفرن .. وبصراحة أنا بأموت فيها وهى بتتشوى .. قد إيه بتملا البيت بعبق خاص وأروما مميزة وبتسيب عندى إحساس على قوى بالبهجة والسعادة والرضا 

 بس المهم فيه نصيحة مهمة قوى .. اننا ممكن ناكل البطاطا أكتر فى الأيام الباردة كفطار .. وده عشان تدفينا من خلال حرق السعرات الحرارية الموجودة فيها .. طول اليوم .. سامعين .. طول اليوم .. يعنى الأفضل بلاش بطاطا بالليل .. لو كنا عاوزين نتلم ونعمل رجيم صح .. عرفتوا .. ادعوا لى بقى أقدر أقاوم الكوزين اللى فاضلين فى المطبخ لحد الصبح ..