اليوم الثانى .. يوم الصمود

اليوم الثانى .. يوم الصمود 

        بالفعل النهاردة يوم الصمود ..  بس هو مش صمود قوى يعنى بس أهى خطوة .. بس ما حدش يفهم من كده انى ما لخبطش النهاردة .. طبعا لخبطت برضه .. بس يمكن أقل من امبارح شوية .. 

طبعا ابتدا اليوم كالعادة كأى يوم شغل تانى .. رغم النهاردة الجمعة .. بس الأمر لله بقى .. صحيت الصبح لقيت مج النسكافيه الجامد .. وجنب منه لقيت رغيف السن الناشف مع علبة اللبنة .. بصيت لهم شوية قبل ما أمد إيدى عليهم .. انتوا خلاص ها تبقوا عادة ولا إيه ؟؟ بس صبحت عليهم وكلت .. لما رحت الشغل كده وبعد الصلاة .. قرصنى الجوع .. طبعا أنا كنت من أول ما نزلت م البيت عمال أفكر .. اكل أيه ما يكسرش الرجيم .. فكرت فى التونة بس تجربة امبارح خلتنى أفكر مرتين .. وكان قدامى انى أختار بين الفاكهة والمشويات .. وبصراحة الإتنين مش سهلين .. الفاكهة ها تحتاج مكان أغسلها فيه .. وده مش متوفر بشكل أدمى جوة التليفزيون .. أما المشويات فلان كافتيريا التلفزيون كانت قافلة عشان الجمعة فما كانش فيه طريق غير انى أبعت أجيبها من بره .. ولان مافيش عمال .. فالحل الوحيد انى أطلبها دليفيرى .. وأكيد كانت ها تبقى تكلفة محترمة!!! .. 

     المهم فضلت طول النهار ادور الأفكار فى دماغى وده خلانى أحس ان فعلا الرجيم حاجة مش سهلة بالنسبة للى بيشتغل طول اليوم بره البيت زى حالاتى .. وعشان كده عملت لكم بحث على إيه انسب الحلول فى الموضوع ده ... بس خرجت منه بشوية ضحك مش معقول .. أصل كل اللى كانوا بيسألوا كانوا بنات .. ومنتدى فتكات فيه أفكار كتير .. بس محتاج الواحد يكون أرنب عشان يعرف ينفذها .. يعنى إيه أخد معايا خيار وجزر فى الشنطة وأقعد أقرقش طول اليوم .. إيه شغل السلاطة ده ؟؟.. وبعدين أنا مش بأشيل شنطة أصلاً .. يعنى حتى الأفكار فيها تمييز برضه .. واحدة تانية قالت خدوا توست فى الشنطة - برضه الشنطة تانى - وهاتوا سندوتشات من بره وحطوها فيه وارموا العيش التانى .. بالذمة مش حرام والنبى العيش يترمى..؟؟.. دى أفكار تخريبية كلها .. ياريت اللى عنده فكرة نيرة كده يقول لى عليها ... 

اللى يضحك فى الموضوع بجد اننا وسط ما أنا طول الوقت بأفكر هاكل إيه عشان ما أبوظش الدنيا .. ضعفت لما سمعت الكلمة السحرية التالية جوا السؤال 

- تاكل كشرى ؟؟ 

وجاوبت "طبعا" .. الحق لله أنا كان بقى لى كتيير قوى نفسى فيه .. بس ما كنتش بأفتكره ساعة الأكل .. أو ما كنتش بألاقى حد يشجعنى عليه .فلما سمعت الكلمة دى النهاردة .. انهارت كل قواى و عزائمى .. و رضخت .. وقلت اهى مرة مش ها تفرق 

      طبعا كلكم دلوقتى ها تقولوا صمود إيه بقى .. أنا قلت انى لخبطت بس مش قوى .. لان الصمود بقى جه بعدين .. اتعزمت على شوكولاته تويكس .. اللذيذة .. اللى فيها كراملة سايحة جميلة فوق راقة بسكويت هش وبتغلفها الشيكولاتة المظبوطة قوى .. أخخخخخ .. بس لا .. صمدت .. و شيلتها معايا طول الوقت .. وحتى لما خلصت الشغل أخدتها معايا للبيت .. ورغم انى أكلت الكشرى الساعة 2:30 تقريبا .. الا انى ما ضعفتش .. و ما مديتش إيدى عليها .. رغم انى كنت جعان .. فكرت أخد منها بار واحد و اسيب التانى .. بس مسكت نفسى .. و أهى محطوطة ع الترابيزة قدامى .. منورة الصالة كلها .. المهم انى اتعشيت فعلا .. بس فاكهة .. زى ما دكاترة الرجيم بيقولوا .. وما بضيتش لتويكس خالص .. لغاية دلوقتى .. وشكلى كده ها أقوم انام قبل ما أغير رأيى .. كفاية التعذيب بتاع امبارح بتاع العسل والطحينة .. على فكرة انا ما جيتش ناحيتهم .. إممممم .. لغاية دلوقتى برضه .. ويالا بقى قبل ما أغير رأيى .. تصبحوا على خير

اليوم الأول : يوم التونة

اليوم الأول : يوم التــــونة

  فشلت .... إلى حد ما يعنى .. 

       بدأت اليوم كويس جدا .. يادوب مج النسكافيه التمام ع الصبح وبعديه بشوية أخذت رغيف سن ناشف مع شوية لبنة .. وقلت حلو قوى على كده .. ها كمل اليوم لغاية الغذا .. بس المشكلة لما رحت الشغل .. قالوا لى احنا ما فطرناش .. وهانجيب لك معانا .. خرجت منى كلمة طيب "ماشى" بدون ما أشعر .. و أنبت نفسى بعدها .. لكن رجعت قلت مش مشكلة دى وجبة بسيطة وكده كده الفطار بيتهضم كله قبل الليل ..

         شوية يا معلم وضربت سندوشتات الفول والطعمية .. وقلت بس كده كويس .. الواحد كده مش هايتحتاج لا يتغدى ولا حاجة .. الفول هايقفل معايا ويسد .. وان كان ولابد ناكل حاجة خفيفة علشان ما نتعشاش .. وأكدت عليهم انى مش عاوز بيبسى عشان ما أزودش السعرات قوى و اكتفيت بشرب المياة اللى شربت منها كتير النهاردة قال يعنى رجيم بقى 

       المهم .. رحت الشغل بعد الضهر .. وقررت أكمل الرجيم اللى بوظت فيه شوية الصبح .. فقررت أكل تونة .. وبعت اشتريها ووصيت على طبق سلطة من مطعم التليفزيون و رغيف عيش واحد بس .. شوية يا عم ولقيت علبتين تونة داخلين عليا ومعاهم أربع ارغفة .. أربعة مرة واحدة .. لا وإيه .. عيش مفقع من اللى متوصى عليه .. قلت مش مهم .. هاكل واحد بس وأفرق التلاتة التانيين .. وضربت إيدى فى الشنطة وطلعت التونة .. كان مفروض انى أصفيها خالص من الزيت .. لكن للأسف .. كانت مش من النوع اللى أنا متعود أكله فى الرجيم .. كانت مفتتة وكانت فى زيت مش فى محلول ملحى زى ما مفروض تكون .. اسيبها .. حرام .. طب أكل واحدة بس ؟؟ طب والتانية؟؟ .. طب ده حتى العلبة صغيرة مش كبيرة وعشان كده اللى بعته جاب اتنين مش واحدة ... ده غير انها بالشطة وطعمها جبار ..  وفضلت محتار .. 

بس ياعم ..  صفيتها على قد ماقدرت وفتحت العلبتين و بدأت أكل منهم .. المشكلة ان الزيت رفض يسيب الفتافيت .. ومعرفتش أكل التونة بالمعلقة بس من كتر زيتها .. والعيش بصراحة كان شكله يجنن .. ما حسيتش بنفسى إلا وأنا بأسحب أخر لقمة فى الرغيف الثالث .. لكن الحق لله .. لما جيت أمد إيدى ع الرابع افتكرت .. فرجعته الكيس تانى
صحيح العيش ما كانش كبير خالص  .. ولا التونة كانت كتير .. لكن محصلة اللى كلته النهاردة من العيش حوالى ثلاثة أرغفة بمقياس العيش بتاع زمان .. تفتكروا أنا كده بوظت الدنيا .. 

  

أنا والله حاولت طول اليوم .. بس الدنيا هى اللى معاندانى  

عموما ً.... مش مهم .. احنا لسه أول يوم .. والجايات أكتر من الرايحات .. المهم كفاية بقى كده لخبطة ولم الدور وخلى العشا زبادى .. ولا بلاش عشا من أصله ؟؟؟ .. 

بس فيه عسل اسود وطحينة فى التلاجة ..؟؟

أسيبهم طيب ؟؟.. هايبوظوا .. طب أخد حبة صغيرين قوى .. ما هو ما حدش فى البيت بياكلهم غيرى .. ولا بلاش 

لغاية دلوقتى أنا بأقاوم .. بس تفتكروا هاصمد .. ؟؟ 

بكره أحكي لكم بقى .. أدعوا لى ربنا يفوت الليلة على خير و أنسى التلاجة واللى فيها 

أول خطوة نحو الهدف !!

الخطة والهدف

على فكرة .. ده مش أنا والله ..

       كتبت تلك الكلمات السابقة كأننى أضع قدراً من الوقار  على الموضوع الذى فشلت فيه طويلاً .. يمكن تنفع المرة دى .. حاولت على مدار 20 سنة انى أخس .. والحقيقة اننى قد حققت الكثير من المرات نجاحاً طفيفاً .. أذكر مثلاً عندما اتبعت الرجيم القاسى مع الطبيبة التى فتحت عيادتها فى أخر الشارع الذى أسكن فيه نجحت ساعتها أنى أقلل وزنى حوالى 15 كجم فى ثلاثة شهور .. لكن الرجيم لم يستمر لفترة أكبر .. للأسف 

ليه ؟؟ حقيقى مش عارف .. كل مرة كانت الحجة مختلفة .. لكن مع الدكتورة اكتشفت انى وصلت لنقطة المنتهى .. جسمى رفض رغم التزامى التام بالرجيم لمدة 3 أسابيع كاملة ..وكمان زودت من عندى ممارسة الرياضة .. جسمى رفض ينزل ولو حتى نص كيلو.. ليه ؟ ... مش عارف وأعتقد ان الدكتورة نفسها ما كانتش فاهمة .. المهم انها نصحتنى انى أوقف الرجيم شوية .. بس بصراحة أنا وقفته كتير حبتين .. ولغاية دلوقتى من 3 سنين مش عارف أرجع له تانى .. 

المهم انى قررت وبعد ما وزنى زاد قوى عن الوزن اللى كنت فيه قبل ما أتابع الرجيم مع الدكتورة .. ومش هاقول كام عشان الناس الفضوليين .. قررت انى أخس .. 

أخيراً أخذت القرار .. كان بقى لى حوالى سنة تقريبا رافض الفكرة فى حد ذاتها .. بس ما أكدبش عليكم .. الظاهر ان الموضوع مش هاينفع أكتر من كده .. بقيت بأتعب .. وأدوية الضغط مش بتجيب نتيجة .. والظاهر بقى انى لابد أعمل رجيم فعلاً 

ولانى قررت انى التزم بالرجيم المرة دى .. حبيت انكم تشاركونى .. يمكن أكون طماع حبتين ..بس بجد محتاج مساندتكم .. ومساعدتكم .. اللى عنده أفكار حلوة يقول لى عليها .. عشان أنا بصراحة مش ناوى أروح لدكاترة تانى .. عاوز أعمل الرجيم مع نفسى كده .. هاحاول ..يمكن أخد وقت أطول .. مش مهم .. بس هاحاول

المهم .. هابتندى من النهاردة 20 سبتمبر 2012 الرجيم 

خدوا بالكم من التاريخ ده كويس عشان ان شاء الله السنة اللى جاية ها كون حققت حاجة .. بس اسمحوا لى انى هاكتب كل يوم عن نجاحاتى و إخفاقاتى .. _(حلوة إخفاقاتى دى ؟؟؟) .. هاكتب كل يوم .. أحكى عملت إيه فى اليوم كله .. ونجحت فى خطتى ولا فشلت وإيه نقط الضعف اللى خلتنى أضعف .. وبعد السنة نتحاسب 

محتاج مساعدتكم بالدعاء .. و النصيحة .. بس بلاش نصايح فيها جبنة قريش عشان مش بأحبها..