بمزاجك .. قبل مايبقى غصب عنك

بمزاجك .. قبل مايبقى غصب عنك 

          ياااااه .. أخر مرة كتبت لكم كان يوم 2 نوفمبر .. ده عمر تانى .. وطبعاً انتوا كلكم فاهمين ليه ما كتبتش .. عشان بصراحة ما كانش عندى حاجة أقولها .. الإرادة وقتها دابت ع الأخر بعد العيد الكبير .. وماقدرتش أرجع تانى للرجيم .. مع إنى كنت حققت حاجة كويسة قوى والله .. بس معلش 

أصل بصراحة عامل التشجيع مهم قوى فى حياة الواحد .. وخصوصاً لما بيكون بيخوض تجربة زى الرجيم .. كلها قلق وتوتر .. وضغط نفسى رهيب من جوه جسمك .. غير الضغوط اللى جاية من بره واللى عادة كنا بنعالجها بأكله بنحبها .. أو حتى حتة شيكولاته أو قطعة جاتوه .. وأنا بصراحة رغم ثناء كل اللى حواليا على مجهودى فى الريجيم .. وعلى النتيجة اللى حققتها .. بس الثناء ده بيخفت مع الوقت .. لانهم مش كل مرة يشوفوك هايقولوا لك نفس الكلام .. فالتشجيع بيقل .. بس الألعن من ان التشجيع يقل .. ان اللى حاواليك يبقوا مش مقتنعين باللى انت بتعمله .. ومش بس كده .. لا ويهاجموك كمان .. مستغربين .. والله حصل معايا .. واكتشفت ان الريجيم بتاعى مضايق ناس قريبين منى قوى .. أو كانوا قريبين منى قوى .. عموما مش مهم .. 

 

المهم انى جيت النهاردة أقول لكم إيه اللى حصل فى الفترة اللى فاتت .. مش عشان أسليكم .. لكن عشان أديكم معلومة مهمة ونصيحة غالية قوى ... أنا مريت الفترة اللى فاتت بمشاكل كتير قوى .. المشاكل دى خلتنى أبطل أهتم بنفسى خالص .. ومابقيتش فارقة معايا رجيم من غيره .. ولا حتى شكل من غيره .. وكنت سايب نفسى مع التيار .. مش عاوز حتى أفكر .. و لا أغير أى حاجة .. عارفين الدنيا لما بتضلم قوى فى وش الواحد ممكن توصله لغاية فين ؟؟ 

 

الحمد لله .. الفترة دى عدت .. بس بعد ما دقت جرس انذار  كبير قوى فى حياتى .. تعبت وقلبى ما بقاش مستحمل .. لانى زدت على وزنى أكتر من الوزن اللى كنت فيه قبل ما أبدأ الريجيم اللى فات .. ولقيت نفسى داخل فى سكة تحاليل ودكاترة .. وموجات صوتية ع القلب .. وأدوية .. بس الدكتور جاب المفيد م الأخر .. قال لى:

" لو ما كنتش تخس .. مفيش فايدة من كل الأدوية دى .. "

 

وعشان كده انا جيت النهاردة أقول لكم .. انى قررت .. ومش بمزاجى المرة دى .. انى أرجع تانى للريجيم .. ومحتاج دعواتكم  .. لان الموضوع بقى مسألة حياة أو موت .. بس أنا مش متضايق من رجوعى للريجيم .. انا حتى وحشتنى غلاسة الجبنة القريش .. وتقل دم التونة .. و الإستظراف المبالغ فيه لسلطة الخضار .. والإستعباط بتاع الفاكهة بالليل ... وماأنساش طبعا حبيبى الغالى .. الزبادى .. 

بس حبيت أقول لكم .. ان الرجيم .. بجد ضرورة .. ولازم يبقى أسلوب حياة .. يعنى مش لازم نمشى على نظام يزهقنا .. بس كل ما نلتزم بالحاجات الصحيحة كل ما النتيجة هاتكون أفضل .. 

*****

أوعدكم انى ألتزم المرة دى .. لان الحاجات الى كانت بتعطلنى .. مابقيتش موجودة .. والناس اللى كانوا بيتضايقوا .. ما أعتقدش انهم هايتضايقوا تانى .. وخصوصاً انى لو رقدت ممكن يتضايقوا أكتر .. 

 

أنا هارجع أكتب تانى .. عن يومياتى مع الرجيم .. يمكن مش كل يوم .. بس أوعدكم انى هاقول الحق .. كل الحق ولا شيى غير الحق .. وربنا يساعدنى .. مانتسونيش بالدعاء .. عشان ربنا يثبتنى وأقدر أحقق هدفى واكون إنسان جديد ..