اليوم العاشر .. السعرات الحرارية

اليوم العاشر .. السعرات الحرارية

          بصراحة كده .. انتوا خذلتونى ..وأنا زعلان منكم ..  كده؟؟ .. ما حدش يدخل يقرا أنا كتبت إيه امبارح؟؟ .. ده أنا كنت بأكلمكم عن يوم العيد اللى هو اليوم الفرى .. عموماً معلش معلش .. انتوا الخسرانين على فكرة يعنى ..

نتكلم شوية جد بقى ..  

تعرفوا ايه عن السعرات الحرارية ؟؟ .. لاوالله مش هاقلب درس ولاحاجة .. أنا بس باسأل بجد لانى بصراحة قريت كتير قوى عن موضوع السعرات الحرارية ده .. وكلام كتير قوى يلخبط .. وأرقام كتير .. وسمعت كمان عن رجيم السعرات الحرارية بس كنت دايما مش بأفهمه .. الواحد مفيش فى راسه مكان يقعد يحسب أصل البيضة فيها كم سعر و ربع رغيف سن فيه سعرات أكتر ولا نص رغيف بلدى .. تفاصيل تفاصيل تفاصيل كتيييير قوى مملة .. انا اللى فاهمه انى أقلل من الحاجات اللى تحتوى على سعرات كتير.. أخس.. أزود.. أتخن.. صح ولالأ..؟؟ .. تخيلوا لأ .. أه والله لأ .. عارفين ليه؟؟ .. لانى اكتشفت ان الموضوع متعلق بإحتياجات جسم كل واحد مننا .. بمعنى لو أنا رفيع وبأعمل مجهود كبير مسموح لى أكل نسبة كبيرة من الأنواع اللى بتحتوى على سعرات كتير .. أما لو كنت تخين (زى حالاتى كده ) ومجهودك قليل يبقى لازم تقلل يامعلم .. 

طبعاً الموضوع بالشكل ده محتاج حسبة .. طب تتحسب ازاى .. دورت لكم على طريقة سهلة .. لقيت موقع بيقدر من شوية بيانات بسيطة يحسب لك اللى انت محتاجه .. والموقع ده الرابط بتاعة مع الصورة اللى جاية 

  

إيه اللى فتح موضوع السعرات ده النهاردة ؟؟

          أصل أنا بصراحة قررت النهاردة انى ألتزم لاخر مدى .. وفى الفطار اعتمدت على عيش السن بس فى الأكل مع شوية جبنة ملح خفيف وطماطم وبيض مسلوق .. وطبعا مج النسكافيه الجامد اللى من غيره يومى بيبوظ .. أما فى الشغل فالنهاردة ما أكلتش حاجة خالص غير كيس شيبسى .. طبعا سامعكم بتضحكوا وبتشهقوا من الخضة .. أيوة .. كيس شيبسى .. وده بعد إلحاح كبير كمان من زميلتنا المونتيرة الفنانة الجميلة سهير .. اللى كل مرة تتحفنى بحاجة حلوة فى المونتاج .. أنا رفضت انى أقبل عزومتها على شوكولاته أو بسكويت عشان ما أغيرش النظام .. بس هى أصرت و جابت لى كيس الشيبسى .. ولانى ما كنتش ناوى أتغدى .. قبلته منها وكلته فى ميعاد الغدا .. المهم بعد ما أكلت الكيس وقبل ما أرميه بالظبط اخدنى الفضول أشوف عليه كاتبين كام سعر حرارى عن الكيس .. لقيتهم كاتبين ان كل 10 جرام من الشيبسى فيها حوالى 49.3 سعر حرارى .. وده صعقنى فعلاً .. لان الكيس حوالى 61 جرام بمعنى اخر الكيس كله بيعمل 295.8 سعر حرارى .. 

الكيس كله بيعمل 295.8 سعر حرارى ..

          أنا كنت عارف ان الجسم الطبيعى للرجل البالغ يحتاج حوالى 4000 سعر فى اليوم عشان يكون سليم .. وطبعا المعلومة دى صدمتنى جدا .. بقى كيس الشيبسى التافه اللى الواحد بيجيبه عشان النأنأة ده .. ولا بيشبع ولا بيسد .. فيه كل السعرات دى ؟؟  .. ده على كده بقى أنا كنت بأضرب حوالى 10000 سعر فى اليوم وأنا مش واخد بالى .. 

 المهم حبيت أكتر أتأكد من معلوماتى عن السعرات الحرارية فدخلت عملت بحث سريع وعرفت منه ان بالنسبة للسعرات .. كل جسم بيعتبر حالة خاصة .. من حيث الوزن والطول و نسبة الحركة المبذولة فى المتوسط .. والسن كمان .. وعرفت من كده ان السعرات اللى أنا محتاجها مش مفروض بأى حال تزيد عن 3200 سعر حرارى فى اليوم .. أكتر منها أتخن .. اقل منها .. أخس .. بس عموما .. الواحد كده ضامن انه مش هايموت م الجوع .. وان أربع أكياس شيبسى ممكن يسدوا معانا نص اليوم على الأقل لولا الزن ع الودان بتاع النفس 

         وبمناسبة النفس .. طبعاً كتير من الصحاب اللى متابعنى من الأول هايستغربوا انى قعدت اليوم على كيس شيبسى واحد بس .. معقولة يكون قدر يسيطر على جوعه بالقوة دى .. ؟؟؟ أحب أقول لهم اطمنوا ..أبسليوتلى ..  ما حصلش .. بس انا النهاردة مراكز الإحساس عندى مشغولة بشيئ أكبر من الإحساس بالجوع .. وهو الألم اللى فى رجلى .. أصل أنا بأعانى من آلام مبرحة فى مفاصل رجلى الشمال .. ومش قادر أحرك صوباعى الكبير خالص .. وأى حركة بتسبب لى ألم جامد قوى .. الحالة دى بتيجيى لى تقريباً فى كل سنة فى نفس الوقت .. تقعد يومين وتروح .. ومش عارف سببها .. ولا إيه اللى بيعالجها بالظبط .... 

          عموما ً الحمد لله .. أهى رجلى برضه بتساعدنى فى الرجيم .. وهو ده رجيم جديد قوى .. هاسميه الرجيم بالألم .. ربنا ما يحكم على حد بيه .. ادعوا لى ربنا يخفف عنى عشان أرجع امارس رياضة المشى زى ما كنت مخطط قبل كده .. لانى بصراحة بأزك بس اليومين دول .. الحمد لله على كل حال .. 

          أخر حاجة عاوز أقولها عن العشا .. انا رجعت وعندى نفس الحالة من الزهد فى الأكل .. بس كنت جعان شوية .. دخلت المطبخ ..لقيت لسه فيه خرطة مكرونة فرن من اليوم الفرى امبارح .. بس مارضيتش أقرب لها عشان الرجيم .. رغم انى لو أكلتها كنت هابقى سعيد قوى .. مش قلت لكم الرجيم بالألم ده فعال جداً ... 

         حاولوا تدخلوا على الموقع اللى ذكرته لكم .. هايقدر يحسب لكم السعرات اللى انتم محتاجينها بالظبط .. ولو حد فاهم حاجة فى جداول السعرات الخاصة بأنواع الأكل .. يفهمنى .. وياريت لو يشيرها على صفحة المدونة ع الفيسبوك عشان كلنا نستفيد منها .. 

تصبحوا على خير

اليوم التاسع .. يوم العيد نفسه بقى

اليوم التاسع : يوم العيد نفسه بقى 

        طبعاً النهاردة العيد ..مش أنا النهاردة اليوم "الفرى" بتاعى .. وأنا كنت عامل حسابى من امبارح زى ماقلت لكم .. وجبت معايا الشوكولاتة والذى منه .. لزوم العيد .. وطبعا امبارح عديت ع المخبز وجبت مينى كرواسون علشان الفطار النهاردة ... وفطرت بيه الصبح .. مع شوية جبنة شيدر .. وطبعاً ما نسيتش العسل والطحينة .. اللى كانوا واحشينى قوى .. 

 

          طبعا انتوا فاكرين انا كنت طلبت منكم إقتراحات عشان أكل النهاردة .. جانى أقتراح من واحد صاحبى .. بيحاول فى الرجيم زيي كده من زمان .. ونصحنى انى أكل :

"المحشي والبط البلدى مع ملوخية ناشفة و سلطة بلدى بالثوم والجرجير :)" ..

 أنا نقلت لكم الجملة زى ما هو كاتبها بالظبط .. طبعا بأشكر له اقتراحه اللذيذ ده .. بس للأسف احنا أخر الشهر .. ودى عايزة ميزانية الشهر الجاى كله عشان اليوم ده .. 

          أما أختى حبيبتى فقالت لى طبعا " عسل وطحينة " .. وكنت فطرت بيهم فعلاً فرديت عليها وقلت لها " حصل .... وطحينة " .. بس أفضل إقتراح جالى بصراحة كان من بنتى العزيزة .. قالت لى ناكل مكرونة فرن .. و فراخ بانية .. من بتاعت ماما .. طبعا وافقت على طول .. ولو أن موافقتى دى كانت على دماغ ماما .. زوجتى الحبيبة .. 

قعدت طول النهار توضب فى صينية المكرونة الرائعة اللى مافيش زيها اتنين فى الدنيا .. ولما رجعت من الصلاة .. ما كانتش لسه خلصت .. فقمت أساعدها .. أو بمعنى أصح أنأنأ من اللى هي بتعمله .. والإسم بأساعدها .. قالت لى استنى لما الأكل يخلص عشان أكل منه بنفس .. قلت لها أنا مش حاسس ان النهاردة يوم فرى .. أنا من الفطار ما أكلتش أى حاجة .. فضحكت وسابتنى أعك براحتى .. 

مكرونة فرن صحيح .. بس مش زى بتاعتنا . ..

             لما جه الغدا بقى قعدت أنا ونانا ( بنتى ) نتغزل فى صينية المكرونة .. ونفتكر بحسرة الصينية اللى حاولنا أنا وهى نعملها لماماتها - من وراها فى عيد ميلادها .. كان اسمها مكرونة فرن .. بس هى كانت بعيدة حبتين عن المكرونة الفرن .. أو عن الشبه اللى زوجتى الحبيبة عملته النهاردة .. وقعدنا نقارن بين اللى احنا عملناها سوا .. واللى ماما عملتها لنا .. وده شجعنا .. اننا ما نكررش التجربة تانى .. هههه 

 بس تعرفوا ان المكرونة الفرن بالذات ليها تقدير كبير عندى قوى .. أصلها كانت اول أكله متكاملة أعرف أعملها لوحدى قبل الجواز .. وساعتها أمى كانت مبهورة بيها .. بس الظاهر الواحد لما بيكبر .. أيده بتتقل وبينسى الطريقة .. أما الذكرى الثانية اللى مرتبطة بالمكرونة الفرن فى ذاكرتى .. كانت حادثة لطيفة جدا حصلت لى بعد ما نانا شرفتنا فى الدنيا .. 

كانت نانا لسه فى شهورها الأولى .. كانت يادوب ابتدت تاكل زبادى ومهلبية .. وكانت بتحب المهلبية قوى .. وعشان كده كانت لميا بتعملها لها كتير .. وفى يوم قررت انها تعمل لنا مكرونة فرن .. بس من كتر تعبها مع نانا .. نسيت وعملت البشاميل بالسكر .. كأنه مهلبية .. تصوروا .. وما خدتش بالها إلا وإحنا بناكل .. ساعتها ضحكنا كتير قوى .. وكلناها كلها .. وكانت فعلاً .. أحلى .. مكرونة فرن أكلتها فى حياتى .. ولسه بأفكرها بالموضوع ده من وقت للتانى .. لما أحب أغلس عليها طبعا ًً

المهم انى ضربت المكرونة الفرن فى الغدا .. بعد النأنأة الى كانت قبل الغدا بالطبع .. وبعد الغدا .. أكلت كحكتين من بقايا كحك العيد .. كان برضه واحشنى جدا .. بس ما قدرتش أمد إيدى على الشوكولاتة لغاية دلوقتى .. المشكلة انى كنت عاوز أوقف اليوم "الفرى" عند وجبة الغدا .. ويبقى العشا عادى عشان الدنيا ما تبوظش قوى .. بس لسه مش عارف هاقدر ولا لأ ؟

           عموما انا لسه فى الشغل .. وقدامى حوالى ساعتين كمان على بال ما أروح من هنا .. لما أروح بقى أشوف حل فى المشكلة دى .. أصلى حساس انى داخل على اسبوع صعب شوية .. يا ترى هاكمله ولا لأ .. تشجيعكم ليا بيدينى باور جامد .. وياريت اقدر أكمل على خير .. 

مستنى أراءكم على الفيس بوك .. او هنا. ( بس ماتنسوش تكتبوا اساميكم ) . واشكركم كلكم على التشجيع .. وادعولى بالتثبيت .. وربنا يقدرنا .. 

إممم ... هى الشوكولاتة فين ؟؟؟

اليوم الثامن : ليلة العيد ..

اليوم الثامن : ليلة العـــيد 

               أيوة الليلة دى ليلة العيد .. مش بكرة اليوم الفرى Free ؟

عمال أفكر من أول النهار فى أكتر حاجات واحشانى عشان أكل منها بكرة ..قبل ما أرجع تانى للرجيم .. تقترحوا عليا إيه ؟؟ ولا بلاش اقتراحاتكم لحسن تقلب بغم وتفتحوا نفسى ع الدنيا كلها و ما أعرفش أصدها تانى .. الحمد لله انا النهاردة ماشى كويس جداً .. أكل رجيم وكلنا .. شاى أخضر وشربنا .. مشى ومشينا .. بس مش قوى يعنى .. أقصد المشى مش حاجة تانية .. طبعاً باستثناء الفطار زى ما أنا معودكم من أول الأسيوع اللى فات .. لسه هاظبطه بس من أول يوم السبت ان شاء الله 

بس باقى اليوم .. كنت محترم نفسى والله .. المهم انى ما نسيتش أعدى على السوبر ماركت واجيب الشوكولاتة اللى واحشانى .. "تويكس" .. بس للأسف ما لقيتش منها الجديدة اللى بالشيكولاتة البيضا .. جربتوها؟؟ طعمها رااااااااااااااااااااااائع .. مالهاش حل ..بس للأسف ما كانتش موجودة .. تتعوض الأسبوع الجاى ان شاء الله .. وخليها عادية المرة دى .. المهم مفيش بكرة تونة تانى ..

        النهاردة بقى كان وقع خبر فقدانى 5 كيلو من أول أسبوع محل نقاش تقريباً طول اليوم .. الناس منبهرة بكده .. فيه منهم اللى بيشجعنى .. ومنهم اللى مش مصدقنى .. ومنهم اللى بيجاملنى .. ومنهم اللى بيحقد عليا .. والله دى حقيقة .. بس مش هاقول مين اطمنوا .. 

كتير منهم سألونى ازاى عملت كده رغم انك ملخبط فى الأكل طول الأسبوع زى ما إحنا بنقرا .. والله ببساطة شديدة ده حصل لانى كنت أكثر لخبطة قبل كده .. وعملية الأكل فى وجبات فى مواعيد شبه منتظمة .. بالإضافة إلى عدم الأكل بالليل و شرب المياة الكتير كل دى حاجات بتأثر مع الواحد .. خصوصاً فى الأسبوع الأولانى .. لان أول حاجة بتنزل من الوزن هى الدهون حديثة التكوين .. بالإضافة طبعاً لكمية الأملاح اللى لما بتنزل مع المياة الكتيرة .. بتفضى المية من الجسم و تمنعه من إختزانها وبالتالى تنزل وتنزل معاها نسبة كتيرة من الدهون حديثة التكوين ..ويقل الوزن 

المشكلة الحقيقية فى الفترة اللى جاية .. لان اللى جاى أصعب .. انك تخلى الجسم يتخلى عن المخازن السرية بتاعته ويفقدها .. دى مسألة محتاجة وقت ومجهود .. وأنا عارف ان اللى جاى أصعب عشان كده بأطلب منكم ان دعمكم لى ما يقلش .. وتشجيعكم ليا ما يفترش .. اللى جاى أصعب والله .. وربنا هو المعين 

صفحة الفيسبوك 

بصراحة تشجيعكم ليا خلانى أعمل صفحة ع الفيس مخصوص للمدونة وده عشان كل التعليقات تبقى فى مكان واحد و كل الفايدة تعم ع الناس كلها .. لان ناس كتير بيقترحوا اقتراحات مفيدة .. وطبعاً فيه ناس اقتراحاتهم تودى فى داهية .. أقصد مش مناسبة .. خلينى مؤدب عشان ما حدش يزعل .. بس عموما النقاش ده حاجة صحية جدا .. 

بس كمان عاوز أقول لكم ان صفحة الفيسبوك مش هاتبقى عن اللى بأكتبه بس فى المدونة .. انما ها نعمل فيها موضوعات و أخبار لكل ما يتعلق بالرجيم و الأنظمة الغذائية والصحية .. واهم الحاجات اللى ممكن تساعدنا نقلل الوزن ونكسب الصحة فى نفس الوقت .. وعشان كده أنا بأدعوكم كلكم .. كل واحد عنده فكرة حلوة يطرحها للنقاش .. انا فاتح الوول على فكرة ومستنى أسمع منكم .. كفاية انى داوشكم بكلامى طول الوقت .. ويارب ما تكونوش زهقتوا منى .. 

المهم انا النهاردة عاوز أحكى لكم عن تجربة جديدة .. لما بعض الناس كانوا مش مصدقين وكانوا فى عنيهم باين قوى عدم تصديقهم رغم ان كلامهم مشجع إلى حد ما .. قررت أتحقق بنفسى من مكان محايد .. فرحت أجزخانة من الأجزخانات الى عندها ميزان كبير .. اللى بيقيس الطول والوزن و نسبة الدهون .. وما إلى ذلك .. ناقص عليه يقول لى على اسم امى كمان .. المهم ان التجربة كانت مفيدة ..وعرفت معلومات مهمة .. أكدت لى موضوع الخمسة كيلو ده .. يعنى أنا فعلاً نزلت الخمسة كيلو .. والحمد لله .. بس المشكلة انها حسستنى ان لسه قدامى كتييييييير قوى .. عشان الوزن المثالى بتاعى - حسب كلام الورقة - تقريبا أكتر شوية بسيطة من نص وزنى .. وأنا مش متخيل انى مهما نزلت .. هاقدر انزل نص وزنى .. تفتكروا .. ؟؟ 

بس التجربة كانت لطيفة قوى .. رغم انى كنت حاسس انى زى الموديل فى عرض أزياء .. لما فجأة الأجزخانة اتملت ناس .. ووقفوا كلهم يبصوا على الكائن اللى بيتوزن ده .. أصل مشكلة الميزان انه بيعمل صوت عالى قوى .. ويخلي كل اللى واقف لازم ياخد باله ..ودى حاجة محرجة شوية خصوصا للى زى حالاتى .. بس ولا همنى .. وطنشت خالص أكنى كنت فى الأجزخانة لوحدى .. ونظرة الثقة دى هى اللى خلت ناس كتير تطلب تتوزن بعد ما أنا خلصت .. وده خلى الدكتور اللى واقف ينبسط منى قوى .. بس برضه فضل عندى إحساس الموديل فى عرض الأزياء .. وأزياء سخيفة كمان 

بس بصراحة كنت محتاج للبيانات دى .. وهما بيدوهالك فى ورقة عشان ما تنساهاش .. وعلى أساس البيانات اللى فى الورقة دى أنا هابنى معلوماتى عن تطور الرجيم معايا  .. حاسس انى شايف الفضول فى عنيكم .. ... طبعا مش ها قول لكم على الى فى الورقة .. على الأقل مش دلوقتى .. بس اوعدكم تعرفوا انا ماشى صح ولا لأ .. وعليت ولا نزلت .. ولا زى ما أنا .. واطمنوا .. بالمعايير اللى فى الورقة دى .. شكلنا مكملين مع بعض شويتين .. بس انتوا ما تزهقوش منى .. 

ها .. اقتراحاتكم ايه بقى عشان اليوم " الفرى " ؟؟؟

اليوم السابع : خسيت خمسة كيلو

 اليوم السابع : خسيت خمسة كيلو 

  لولولولولولولولولوى

تصدقوا .. والله العظيم .. خسيت خمسة كيلو .. وده بالنسبة لى شيئ رائع و أكتر من رائع كمان .. مش أنا اللى بأقول على فكرة ده الميزان ..  أصل بصراحة النهاردة لقيت تشجيعات كتير قوى من ناس كتير .. وكل واحد حط تعليقه لما قابلنى  كان بيأثر فى قوى .. وكمان بعض الناس قال لى انى فعلاً خسيت .. زى ما فيه ناس تانية بيستبعدوا الموضوع ده خالص .. بس أنا بصراحة حسيت بتغييرين فى اليومين الأخيرين دول (امبارح والنهارده ) أولا حاسس انى أخف .. حركتى أسرع .. وإيقاعى كمان .. وبأقدر أصلى من غير ما أنهج زى الأول .. أما الحاجة التانية انى حسيت ان نفسى بدأت تكتفى بالكميات القليلة من الأكل فى الغدا والعشا .. وما بقيتش أحس بالجوع قوى .. وده تطور تانى مهم قوى فى أى رجيم .. وعشان كده قررت انى أشوف بعد مرور اسبوع من التجربة .. ايه اللى حصل .. بصراحة اترددت كتيير قبل ما أقف ع الميزان .. خفت ما يكونش حصل أى تغيير ..لكن لما لقيت نفسى نزلت خمسة كيلو مرة واحدة رقصت من الفرحة .. 

خسيت خمسة كيلو

على فكرة .. هما خمسة كيلو فعلاً مش بأخمس فى وشكم ولا حاجة والله .. مع انى خايف أحسد نفسى .. يمكن أكتر نص أو أقل نص بس مش ممكن حتى لو كان الميزان أهبل انه هايغلط فى خمسة كيلو مرة واحدة ..

طبعا مش مصدقين .. وأكيد بتقولوا ازاى بعد العك ده كله يخس خمسة كيلو مرة واحدة .. وبصراحة أنا كمان ما كنتش مصدق لكن لما لقيت الميزان نزل من .. إحم .. ما علينا .. نزل خمسة كيلو عن الوزن اللى كنت عليه قبل ما أبدأ الرجيم ..فرحت قوى .. صحيح هو مش ميزان ديجتال لكن الفرق مش ممكن يبقى كبير كده لو ما كانش موجود أصلا ..و بصراحة ومش هاكدب عليكم زى ما عودتكم من أول ما ابتديت اكتب لكم .. كنت بألخبط شوية .. بس معظم اللخبطة لو لاحظتم كانت فى وجبة الفطار بس .. وكنت بأخلى بالى جدا فى وجبة العشا انها تكون زبادى او نوع واحد فاكهة زى ما كل الدكاترة بتوع الرجيم قالوا لى .. وريحت نفسى خالص من بالليل .. وبكده أكون حققت المقولة الذهبية والنصيحة المفضلة عندى فى الرجيم 

"افطر فطار الملوك .. واتغدى غدا الأمرا .. واتعشى عشا الغلبانين .. "

وكمان أنا التزمت خلال الأسبوع ده بحاجتين فى منتهى الأهمية .. 

الحاجة الأولى انى بطلت تماما شرب المياة الغازية بأنواعها .. حتى الدايت منها .. وده ساعد كتير قوى ان بطنى ترتاح و .. زى ما بيقولوا بالبلدى والطبيعة تنتظم 

 

أما الحاجة التانية فكانت انى قللت كتير من الملح فى الأكل .. لان الملح بيساعد انه يخزن المية فى الجسم وبيمنع العرق .. وعشان كده نسبة احتفاظ الجسم بالدهون بتكون أكتر 

المشكلة مش فى اللى فات .. المشكلة فى اللى جاى .. أصل أول أسبوع دايما بيبقى النزول فيه أسهل بكتير لان دى بتكون الدهون اللى متكونة حديثاً و كمان نسبة كبيرة من المياة .. انا فى الرجيم اللى تابعت فيه مع دكتورة قبل كده .. نزلت تمانية كيلو مرة واحدة فى أول أسبوع .. بس كان الرجيم التانى كله حرمان بالقوى .. وكمان اعتمد على دوا معين كده اسمه سيدوفاج بيمنع السكر فى الدم .. واتضح بعد كده انه غير آمن ولا صحى وعشان كده أنا بعدت المرة دى تماما عن الأدوية .. وده حوار هانبقى نتكلم فيه بعدين .. 

لكن انا ناوى أستعمل استراتيجية جديدة خلال الفترة اللى جاية .. 

أولا : هابتدى امارس الرياضة تانى على خفيف .. يعنى شوية مشى كده كل ما أقدر بمعدل 3 مرات أسبوعياً على الأقل 

تانى حاجة : انى ها حاول والله انى أضبط الفطار شوية .. وأقلل من العك الكتير اللى بأعمله من أول الأسبوع ده .. عشان يبقى الفطار فطار رجيم بجد .. بس مش قوى يعنى 

أما عن النهاردة .. فبكل صراحة برضه عكيت شوية صغنين فى الفطار .. مش زى عك اليوم اللى قبله واللى مرضيتش أقول لكم عليه .. بس فى الغدا أكلت حاجة بسيطة قوى ولسه ما اتعشيتش لغاية دلوقتى عشان خاطر عيونكم .. بس محضر البرتقانة التمام .. ومستنى أخلص بفارغ الصبر عشان هاموت م الجوع .. 

 على فكرة البرتقال الأخضر لذيذ جدا اليومين دول .. كل سنة وانتم طيبين 

 طبعا بقى حيث ان النهاردة اليوم السابع فمن المفروض انى أعمل يوم (Free) بكرة .. بس هاضطر أأجل اليوم ده ليوم الجمعة عشان استفيد من وجودى فى البيت مع العيلة .. وناكل أكله حلوة بقى .. فينك يا جمعة .. 

وأخر حاجة لازم أشكركم كلكم .. تعاطفكم معايا وصلنى .. حتى اللى ما كتبش حاجة او علق .. إحساسكم وصلنى .. وبأشكر كل اللى شجعنى وادانى طاقة وحماسة انى أكمل الأسبوع الأول .. بس همتكم معايا بقى بعد كده .. بحبكم .. تصبحوا على خير

 

اليوم السادس : الشــــاى الأخضـــر

اليوم السادس : الشاى الأخضر

       لسه برضه مش عارف أعمل كنترول على الفطار .. بيهرب منى كل شوية وكل يوم بحجة مختلفة .. وده لانى بصراحة بأكون جعان جداً من الليلة اللى قبلها .. يعنى نايم على جوع .. وبالتالى بأصحى عليه .. لسه ما أخدتش انى أنام خفيف .. حتى رغم ان الأسبوع الأولانى قرب يخلص .. ومش هاقول لكم أكلت إيه فى الفطار النهاردة عشان ضميرى بيأنبنى كفاية .. مش هاتبقوا انتم وهو عليا .. بس عذرى انى النهاردة مشيت كتير شوية ...

أصل النهاردة بنتى حبيبتى .. كان عندها تدريب الساعة 5:30 .. بس الصبح مش بعد الضهر .. نزلنا م البيت بعد الفجر بشوية كده .. وأنا بنفسى اللى فتحت باب النادى .. والله النادى كان مقفول وأنا اللى فتحته .. وعشان ماكانش عندى حاجة أعملها فى الوقت ده .. وما كنتش لسه فطرت وبطنى كانت عمالة تزن عليا .. قلت أقوم أمشى شوية .. عملت كده كام لفة فى التراك و انبسطت قوى من ريحة هوا الصبح الجميل .. بجد تجربة تستحق ... خصوصا ان النادى بيكون فاضى خالص وممكن تاخد راحتك فيه ومافيش تشويش على أى تركيز .. يعنى لو عايز تفكر فى أى موضوع وانت ماشى ها تعرف .. وتبقى استفدت من المشى والتفكير فى نفس ذات الوقت ..

طبعا تعبت شوية فى المشى عشان كان بقى لى مدة ما عملتوش .. بس ناوى أكرره كذا مرة كده .. لغاية ما يبقى مفيد .. بس المشكلة انه فتح نفسى على الأكل أكتر .. وخلانى جعان حبتين شوية .. وعشان كده حصل اللى حصل .. على فكرة بلاش ضحكات خبيثة عشان انا سامعكم .. وبرضه مش ها أقول أكلت إيه .. 

اسمه "كاميليا"

انما الحاجة المهمة اللى حصلت النهاردة انى بدأت فى استخدام الشاى الأخضر .. طبعاً كلنا عارفين ان أى حد بيعمل رجيم بيستخدم الشاى الاخضر عشان بيحرق الدهون .. بس حد فينا يعرف ان الشاى الأخضر اسمه "كاميليا" .. أه والله .. وعلى فكرة ده مش نوع زى الشيخ الشريب كده والعروسة وغيره .. ده الإسم العلمى للشاى - أو بالأصح نبات الشاى واسمه كاميليا سينينسيس  Camellia sinensis  .. المعروف ان جميع أنواع الشاي سواء الأسود أو الأخضر متحضرة من نفس النبتة و هي نبتة الشاي و الفرق بينهما هو طريقة تصنيع كل نوع،

ففى الشاى الأسود الأوراق بتتعرض لعلمية أكسدة وده اللى بيسبب تغير في اللون الى الأسود و زيادة في النكهة بس ده بيؤدى إلى فقد بعض من المركبات الكيميائية بما فيها مضادات الأكسدة أما الشاي الأخضر فيتم تحضيره بتعريض الأوراق للبخار وبعدين تجفيفها وعلشان كده بيتم فيها حفظ المركبات المفيدة زى مضادات الأكسدة بشكل أكبر من الشاي الأسود.

بس تعرفوا كمان ان فيه  شاى أبيض .. زى الفيل الأبيض كده .. وده الشاى اللى بيتوزع على إنه شاى للتخسيس وهو بالمناسبة مش نوع خاص من الشاى ولا حاجة ولا حتى محطوط عليه إضافات تانية .. انما بيتحضر بأقل مجهود ممكن وهو عن طريق تعريض الورق بتاع نبتة الشاى فى الهوا بعد ما تتقطف .. وتتساب على كده .. من غير بخار ولا دياولوا .. زى الملوخية الناشفة كده .. وعشان كده بيكون محتوى على مضادات الأكسدة التي بتحافظ على الصحة و بتقى من السرطان وده كمان سبب نكهته الخفيفة و لونه المائل الى البياض.

البن الأخضر

      بس بقى الحاجة الجديدة جدا اليومين دول فى موضوع الرجيم وفقا للصفحة اللى حاطط لكم اللينك بتاعها على الصورة اللى جاية هى البن الأخضر .. زى مافيه الشاى الأخضر بقى فيه البن الأخضر .. وشوية شوية هايبقى عندنا كمان الرجل الأخضر .. وده طبعا اللى بيشرب شاى أخضر كتير .. وبن أخضر كتير .. بس عارفين إيه هو البن الأخضر؟؟

http://econsumerlifestyle.com/index2.php?sid=SourceA

               الغرب معتبرين انهم اكتشفوا اكتشاف كبير .. وهو انهم لو شربوا البن من غير تحميص بيكون أفيد بكتير لكل الصحة .. بيؤدى للتنبيه وزيادة التركيز و بيساعد فى تنشيط القلب و كمان بيساعد على التخسيس عشان مضادات الأكسدة فيه موجوده بغزارة .. وكمان فيه مادة اسمها "كلوروجينيك أسيد  Chlorogenic Acid" والمادة دى بتساعد على تحفيز حرق الدهون بسرعة فى الجسم مع قدرتها الفريدة على تحرير الجلوكوز فى الدم .. وبالتالى بتخسس .. وبيقولوا انهم عملوا تجارب على مجموعة من 16 شاب لمدة 12 أسبوع تناولوا فيها البن الأخضر بانتظام (على فكره عاملينه على شكل كابسولات فى علبة ) وكانت النتيجة ان كل واحد منهم خس حوالى 7 ونص كيلوجرام ..أو حوالى 10% من وزنه.

                       

       اللى يضحك فى الموضوع ده .. ان البن الأخضر ده أصله عربى .. يعنى إيه؟؟ .. يعنى ان العرب أول من استخدمه وهو عباره عن نبات البن العادى وكان العرب بيشربوه من زمان جدا مغلى بدون تحميص .. وده قبل اكتشاف التحميص بفترة طويلة جدا بس العرب لسه بيشربوه لغاية دلوقتى .. وهو القهوة العربى .. وكمان بيضيفوا عليها الحبهان والمستكه اللى بيحسنوا الهضم و يريحوا الأعصاب ويقللوا من تأثير الكافيين الموجود فى البن ..

          

شوفتوا بقى ان العرب لسه ملهمين .. بس للأسف أجهل من انهم يطوروا نفسهم ويحاولوا يحسنوا من علومهم وعشان كده الغرب بيسبقنا وتلاقيهم بعد كده هايسوقوا الكابسولات بتاعتهم دى عندنا بالشئ الفلانى .. واحنا طبعا أمه مستهلكة كالعادة ..

     اخر نكتة بمناسبة الشاى الأخضر .. كان عندى واحد صاحبى قرر انه يخس باستخدام الشاى الأخضر بس .. فضل يشرب كل يوم من 3 إلى 4 كوبايات كل يوم .. بس ما خسش .. عارفين ليه .. عشان كان بيحط على كل كوباية 5 معالق سكر .. تصوروا .. ده لو ما شربوش كان خس لوحده .. ده لو ماكانش تخن أصلا

أسيبكم بقى دلوقتى عشان أروح أعمل لى فنجان قهوة عربى .. بس خايف يسهرنى وبصراحة لو سهرت هاجوع وها أضطر أكل عشان انام ..طب إيه ...  بكرة بقى أحكيلكم .. تصبحوا على خير

اليوم الخامس : رجيم آه .. بس بنأنأة

اليوم الخامس : رجيم أه .. بس بنأنأة

           النهاردة مش قادر أقول لخبطت ولا ملخبطش .. هو يوم ملخبط بالنسبة لى .. فالفطار كان فيه لخبطة شويتين علشان فطرت سندوتشات من عند الشبراوى .. ودى طبعا عيش و زيت والذى منه .. أما الغدا فكان كويس إلى حد ما .. تونة .. تانى .. حلوة دى "تونة تانى" .. ومعاها عيش سن بس .. من غير سلطة .. وحاولت أصفيها على قد ما أقدر .. وما أكلتش كمان بين الوجبات ..اللهم إلا نص قرصة بالشمر .. ده غير النص كحكاية اللى أكلتها الصبح قبل الفطار .. نأنأة بقى المهم انى تماسكت على قد ما قدرت بقية اليوم .. رغم ان الإغراءات كانت كتير قوى ..  بس مش فذلكة يعنى ولا حاجة .. انما لان النهاردة كان عندى شغل كتييييييييييييييير قوى .. حتى لما اتعرض عليا أخرج مع العيال وهما رايحين يتعشوا بقى بمعنى أدق .. عند المطعم الجديد اللى اكتشفوه فى عابدين ده .. (ها حكى لكم عليه وعلى هانى كمان شوية ).. ما رحتش معاهم .. برضه مش لانى متمسك بالرجيم .. انما لانى كان عندى شغل .. وكمان لانى ما حبتش المكرونة بالسى فوود زى ما هما مبهورين بيها .. 

    أما حكاية مطعم المكرونة بالسى فوود دى فترجع لاخونا هانى عبدالوهاب .. زميلنا فى القناة .. صاحب الموهبة الفذة فى التسويق .. تصدق انه ممكن يبيعلك هدومك وانت لابسها .. وتبقى مبسوط كمان !!.. دايماً نقول له ان عنده موهبة مدفونة محتاجه اللى يكتشفها.. المهم انه كل شوية كده يتحفنا بمطعم جديد .. اصله غاوى يلف فى البلد .. فى كل المناطق .. وما بيخافش من التجربة على الإطلاق .. على العكس .. لما محل بيعجبه قوى .. بيقول عليه لكل الناس .. وكمان بياخدهم فيه ويروح معاهم .. وده طبعاً بيعمل له برستيج خاص عند أصحاب المحلات اللى بيشتروا خاطره وبيكرموه شويتين .. ما تفرقش بقى المحلات دى بتاعت كشرى ولا بتاعت مشويات .. هانى جاى فى أى حاجة .. وعليه طريقة يا أخى .. يقدر يقنعك ويجرى ريقك ويخليك تحلم انك بتاكل فعلا قبل ما تنقل خطوة من مكانها ..طبعا انت كده رسمت له صورة فى دماغك .. بس أوى تكون اللى فى بالى .. أصلها كده مش ها تبقى صح خالص .. وهى دى  المشكلة اللى غايظانى بجد .. انه رغم حبه الشديد للأكل كده .. ورغم كونه ذواقة .. بيفهم ويقــدَََََر الأكل الكويس من اللى أى كلام .. إلا أنه رفيع جدا .. مش جداً يعنى قوى .. بس رفيع .. على الأقل بالنسبة لى .. ازاى مش عارف  .. ربنا يوفقه على كل حال .. بس يفضل بعيد عنى على الأقل اليومين دول .. خلى المشروع يعدى على خير وبلاش يبقى شكلى وحش قدامكم 

المهم انى ما رحتش معاهم عشان كان عندى شغل كتيير قوى .. ومشكلة الشغل الكتير قوى دى اللى بيخلص فى وقت متأخر .. انها بتسيب عندى قدر فظيع من الجوع .. والأصح قدر كبير من الإشتياق للأكل .. وبالذات فى الشتا اللى بدأت نسايمه تهل خصوصا باليل .. وطبعاً ما أقصدش أكل الرجيم .. انما الأكل اللى بحق وحقيقى .. حتى وأنا راجع كنت هاميل على محل الكشرى اللى جنب التليفزيون .. بس مسكت نفسى .. وفكرت كمان أجيب سندوشتات شاورمة وأنا راجع .. بس تراجعت .. وفكرت برضه انى أعمل أكلتى المفضلة .. مكرونة سباجتى مسلوقة وعلى وشها رشة سمن وشوية ملح .. كتير شوية .. وجنبها بقى أصابع الفرانكفورتر العملاق .. سخنة وحامية .. وأديها بقى 

.. حاجة تشبع بصحيح ..... بس برضه ما رضيتش .. دخلت السوبر ماركت .. سحبت ازازة لبن م التلاجة وعلبة زبادى .. وفضلت واقف أفكر .. أجيب ولا لأ ..؟؟ لغاية ما جه البياع سألنى .. حاجة تانية يا باشا؟؟ ..وده بعد ما لاحظ كثرة تلفتى فى المحل يمين وشمال وكان فاكرنى عاوز حاجة بس مش لاقيها .. المشكلة انى كنت عاوز حاجة بس مش عارفها .. عشان اللى عارفه مش هاقدر أجيبه .. وبمزاجى .. وقلت له لأ .. 

طب خلصت الإغراءات على كده بقى .. لأ طبعا .. اكتشفت النهاردة .. ان جنب السوبرماركت فتحت مقلة جديدة .. كنت عاوز أجرب السودانى من عندهم .. خصوصا ً انهم دايما فى الأول بيجيبوا أنضف الأنواع .. بس برضه اتلميت .. ومشيت لغاية بيتنا .. بس برضه لم تنتهى رحلة العذاب عند هذا الحد .. المقلة بقى اللى جنب البيت على طول .. كانوا مطلعين الغربال الكبير بتاعهم .. عشان السودانى اللى لسه طازة .. يبرد .. والسودانى اللى بحبه كمان .. والنبى شفتم إغراءات أكتر من كده ؟؟ .. بس والله ما رضخت .. عديت كأنى مش واخد بالى خالص .. رجعت البيت ... وحطيت الزبادى قدامى وقعدت باصص له شوية بقرف .. استغفر الله العظيم .. أقصد مش بنفس يعنى .. وقلت لما أخلص الحمام أبقى أكل .. خرجت م الحمام ودخلت المطبخ أجيب معلقة .. تفتكروا لقيت إيه .. مكرونة وسجق .. بقية الغدا .. بجد بقى كده كتير .. طبعا نأنأت .. وأخدت حتتين كده مع كام مكروناية .. بس والله مش كتير .. وخرجت بسرعة قبل ما نفسى توزنى أغرز أكتر من كده .. وأدى الزبادى قاعد .. منورنى وأنا بأكتب .. وانا بأتردد .. أكله ولا أنيمه فى التلاجة ليوم أكثر لطافة .. هاشوف .. تصبحوا على خير

زبـــــــــــــــــادىىىىىىىىىى

أول يوم بجد .. والله (اليوم الرابع)

اليوم الرابع : أول يوم بجد .. والله

       النهاردة بصراحة كده .. أنا راضى عن نفسى جداً .. بأعتبر ان النهاردة أول يوم رجيم ليا بجد ..يمكن أكون صحيح لخبطت شوية فى الفطار .. بس كلها حاجات على حساب حاجات ..يعنى أنا مثلا كلت براحتى شوية فى العيش الصبح .. بس فى المقابل ما شربتش ماج النسكافية الجامد بتاع كل يوم .. صحيح دى حاجة مش مقصودة (انى ما أشربش النسكافيه ) لكن أهى جت بفايدة برضه .. 

ونزلت الشغل وقاومت أى مغريات انى أجيب فطار تانى .. زى ما كان بيحصل .. أصل بصراحة سندوتشات الفول من على العربية ليها طعم تانى خالص..  وبالذات لما تكون بالزيت الحار كده و عليها ليمون ومعاها فصوص بصل وقرن فلفل حامى مشطشط .. 

.. الواحد ريقة جرى ع السيرة .. بس بقى .. نرجع لموضوعنا أحسن 

قاومت أى إغراءات .. ولما اشتد بيا الجوع قوى قررت أجرب الأكل المشوى .. بعت جبت فراخ مشوية من كافتيريا التليفزيون .. ووصيت انهم يبدلوا البطاطس المحمرة الى معاها بخضار مسلوق .. و عشان أكمل الشبع يعنى طلبت طبق سلطة بلدى صغير .. ومنعت نفسى فى أخر لحظة انى أطلب عيش أو رز مع الأكل .. قاومت بجد والله 

وجه الأكل ... وكلته بشراهة متناهية .. بس المشكلة ان نص الفرخة اللى كان جاى .. كان شبه الورك اللى كانت بتديهونى امى وانا صغير .. مش عارف الفراخ هى اللى صغرت قوى وبقت أقزام كده ولا الواحد كبر زيادة عن اللزوم .. ولا هي فراغة عين ؟؟ تفتكروا ؟؟ 

             لا والله كانت فعلا صغيرة .. الواحد عشان يشبع منها محتاج معاها تلاتة زيها ع الأقل وبرغم كده  هايفضل جعان برضه .. 

المهم ضربت الفروج ده .. و معاه شوية الخضار السوتية بتاع العيانين .. ومعاهم طبق السلطة البارد السخيف .. وفضلت جعان .. قعدت أبص للأطباق الفارغة .. طب أطلب حاجة تانية ولا أتلم .. وقررت أتلم .. أصل الميزانية مش  مستحملة الواحد يطلب حاجة تانية .. كفاية كده .. والإسم عاملين رجيم 

              حاجة غريبة صحيح .. أكل الرجيم حقيقى بيكلف كتير .. وطعمه وحش و ممل .. ويحسسك ان أيامك فى الدنيا بقت معدودة ولازم تاخد بالك من صحتك .. المبلغ اللى لطشوه منى قصاد الوجبة غير الكافية دى .. كان يخلينى أضرب 3 سندوشتات شاورمة محترمين ومعاهم مخلل وكمان حاجة ساقعة .. حاجة تشبع بصحيح وطعمها لذيذ بجد .. بس الغرض بقى .. كله عشان خاطر الرجيم .. ومن أراد أن يتجمل فليتحمل .. وانا بأتحمل بس إدعو لى ..

 

المهم انى فضلت جعان .. وده خلانى عصبى شويتين .. بس لما بطلت أفكر فى الجوع .. وفى الأكل ..قررت معدتى تكتفى بما أًًًعطيت .. وسكتت وهى مغلوبة على أمرها .. والحمد لله ان ربنا صبرها عليا .. وصمدت معايا لحد ما وصلت البيت .. كل اللى أخدته بعد كده كان فنجان قهوة.. ع الريحة كمان .. ولما أخلص كتابة .. هاضرب ثمرة الفاكهة وتكون كده الليلة جبرت يا معلم .. صحيح بطنى عمالة توز عليا .. وبأشوف هلاوس سمعية وبصرية ,,, وشمية كمان .. ( شامم ريحة أكل مش موجود أصلاً ) .. لكن هاصمد .. 

وعشان كده أنا شايف النهاردة انى شاطر .. ومؤدب و استاهل عشرة على عشرة .. (بالرأفة طبعا لو تجاوزنا عن لخبطة الصبح )

إيه رأيكم ؟؟

اليوم الثالث : يوم الإرادة

اليوم الثالث : يوم الإرادة !!!

        النهاردة ثالث يوم فى مشروع الرجيم "عاوز أخس" .. الحقيقة انى النهاردة كنت سعيد جداً بسبب حاجتين هما اللى صلحوا لى يومى .. 

الحاجة الأولى انى تصديت وصمدت قدام كل الإغراءات الكبيرة .. سواء من شيكولاتة تويكس اللامعة اللى باتت الليلة اللى فاتت على ترابيزة السفرة طول الليل تنور فى الضلمة .. أو من العسل الأسود والطحينة اللى كانين فى التلاجة مستنيين اليوم "الفرى" .. بفارغ الصبر .. زيى بالظبط .. تصديت لكل دول ونمت بعد ما أكلت ثمرة الفاكهة بس .. والصبح كنت صاحى خاسس انى خفيف جداً ونفسى مرتاح .. واستمتعت جداً بتجربة شرب كوب ماء كبيييير أول لما صحيت .. وأنا كلى فخر ودخلت الشيكولاتاية التويكس فى التلاجة جنب العسل والطحينة .. على دكة الإحتياطى ..

أما الحاجة التانية اللى خلقت عندى حالة لاتوصف من البهجة فكان متابعة تعليقات أصحابى الجميلة على الفيس بوك .. حسيت انى مش لوحدى ان كل الناس بتشجعنى .. وفرحت قوى .. رغم ان أستاذتى الجميلة وصديقتى العزيزة مدام شويكار خليفة بخلت على بنصايحها للرجيم بس كلامها اللى زى العسل ده فرح قلبى أخر خمس حاجات...وكمان صديقى المخرج والمعلق الرائع محمد فوزى لما قرر ان اللى بأكتبه يستحق يتحول لعمل درامى وحدد له أبطاله كمان .. ولقبنى بلقب علاء السركى رمز الصمود .. ههههه .. عجبتنى دى .. ربنا يجبر بخاطرك يا محمد 

المهم انى طبعا بدأت اليوم بأفكر فى الفطار .. وازاى يكون خفيف ومشبع عشان ما أضطرش أكل بره و أعك الدنيا كالعادة .. فكرت أفطر بيض مسلوق مع جبنة أو فول .. لكن وأنا لسه بأفكر فى الفطار .. اللى مفروض يكون سريع كمان عشان ألحق أنزل الشغل .. جت بنتى حبيبتى وقالت لى بصوت رقيق وابتسامة تلين الحجر 

      - بابى ... انا عاوزة نفطر مع بعض النهاردة .. 

      - بس أنا عندى شغل ومستعجل 

      - لا يابابى ياريت نفطر مع بعض احنا طول الأسبوع مش بنتقابل .. 

      - طيب ماشى 

     - طيب ممكن يابابى تعمل لى البيض الأومليت اللى بأحبه .. أصل أنا بأحب   اللى انت بتعمله جداً 

أن ااااااان .... تششششش (موسيقى تصويرية)

ساعتها يا معلم " أسقط فى يدى " .. طب أعمل إيه والنبى .. ضعفت .. وعملت البيض أومليت عشان نفطر منه كلنا مع بعض .. صحيح قللت السمن ع الأخر .. لكن برضه .. بيفضل بيض وسمن ولبن .. وبصراحة كان واحشنى ..

قلت خلاص .. مش مهم وجبة الفطار .. وقررت اليوم ما أكسرش الرجيم خالص .. وبالفعل لغاية الساعة 6 تقريباً ما أكلتش أى حاجة .. لا مسموحة و لا ممنوعة .. ما أخذتش غير كوباية شاى واحدة بس .. وقلت النهاردة بقى بمناسبة انى ما عنديش شغل بعد الظهر أروح أشوف أمى .. وبالمرة أتغدى معاهم 

وطبعا لان أمى كانت على رأس المشجعين لموضوع الرجيم و فرحانة قوى باللى أنا عمال بأكتبه هنا كل يوم .. كان من المنطقى تكون محضرة أكل رجيم .. خصوصاً انها عارفة من الظهر انى رايح .. ولما وصلت هناك الساعة 6:30 تقريبا كنت واقع م الجوع .. ودخلت ع السفرة .. تفتكروا لقيت إيه ؟؟؟

على فكرة الصينية اللى عملتها الست الوالدة كان أحلى من دى بكتيييييييير

لقيت صينية بطاطس بالفراخ ... عليها حلقات البصل اللذيذة والطماطم .. محوجة بالقرفة والبهارات .. وجنبها رز بالشعرية .. تصوروا .. لا وإيه مش بس كده .. لقيتها كمان عاملة أجنحة فراخ محمرة بخلطتها السرية .. على طريقة كنتاكى .. بس بيتى ...

قولولى بالله عليكم .. حد جعان أخر تسعين حاجة .. يقدر يقاوم أكل زى ده .. لا وقال إيه كمان فيه طبق سلطة .. لزوم الرجيم .. 

طبعا ً ما كدبتش خبر .. الجوع كافر يا معلم.. الواحد فعلا يقدر يقاوم انه ما يطلبش الأكل ده ..لكن لما يكون قدامك وانت أصلا جعان وكمان من إيد أمك .. لازم تاكل طبعا .. وطز فى الرجيم .. 

طب ختمت على كده بقى وخلصت؟؟؟... لاااااأ .. قال إيه بعد الغدا كماااااان فيه رزباللبن .. دى باظت بقى .. وطبعا أكلته بعد ما أقنعتنى أختى ان كمية السكر اللى فى الطبق مش هاتزيد بأى حال عن معلقة واحدة .. وإيه يعنى شوية رز ولبن .. ما هى مش عارفه اللى عملته الصبح 

خلاصة الموضوع يا إخوانا ان اليوم باظ .. مع انى والله كنت مبتدى بداية قوية جداً وناوى نية قوية جداً بس أعمل إيه بس .. الظروف كلها ضدى .. قال رمز صمود قال .. على فكرة أنا قصدت اسمى اليوم يوم الإرادة .. لان الإرادة اسم وتحتاج لصفة حتى يصبح لها قيمة ومعنى .. وبيتهيألى بعد اللى قريتوه ده ..عرفتوا المعنى اللى أقصده .. بس ما حدش يقوله لو سمحتم .. مش ناقص كفاية تأنيب الضمير اللى عندى 

بس مش هايأس .. وهاكمل .. والنهاردة كده خلاص مفيش حتى كوباية شاى طول الليل .. ومش هافكر فى أى حاجة تخلينى أضعف وعموما انا خبر حل مجلس الشعب عامل لى حالة من البهجة .. والشبع .. مش عاوز حاجة الليلة دى أكتر من كده .. تصبحوا على خير