اليوم الثانى والأربعين : العيد .. فرحة !!!
كل سنة وانتم طيبين .. لا هى مش متأخرة .. لان دى أول مرة أكتب بعد العيد .. وعشان كده تبقى مش متأخرة .. المهم .. عملتوا إيه فى العيد ؟؟ أكيد لخبطوا الدنيا .. مش كده ؟؟ عموماً كلنا لخبطنا فى العيد ..
طبعا أنا كمان لخبطت .. وحاولت انى أسيطر والله بس للأسف ما عرفتش .. أصلى قررت فى العيد انى أسيب نفسى خالص .. مش فرى قوى يعنى .. بس عملت حاجات كتير ضد الدايت ..
صحيح أنا ساعدت نفسى شوية عن طريق الأدوية .. ودى أول مرة من ساعة ما بدأت الرجيم انى أستخدم أدوية .. لكن قلت ما بدهاش بقى .. أصل العيد فرحة .. فأنا أخد الأدوية وأساعد نفسى على قد ما أقدر .. فبدأت أستخدم الشيتوكال .. وده بعد ما كل أصحابى وصفوا لى شعر عليه .. قالوا انه معمول أصلاً عشان يقضى على الكاربوهيدرات فى الدم ويقلل امتصاصها .. وده بالضبط المطلوب فى العيد .. لان الفتة كلها عيش ورز .. والرقاق كمان .. والحاجات اللذيذة دى اللى مالهاش حل .. خصوصاً أنى دخلت فى دوامة عزايم يامعلم .. مرتين عند أمى ومرة عند "حماتى" (على فكرة مش بأحب أسميها كده خالص لانها فى الحقيقة حنينة عليا زى أمى بالظبط بس خفت تتلخبطوا) ده غير الأكل فى بيتنا اللى كنت محروم منه طول الفترة اللى فاتت عشان الشغل ..
بالمناسبة دى أحب أقول لكم ان دول تلات مدارس مختلفة تماما فى الطبخ .. وكل واحدة منهم طبيخها يهبل أكتر من التانية .. فطبيخ أمى اللى اتعودت عليه تحفة .. وطبيخ حماتى انبهرت بيه من أول الخطوبة ..وكان هو السبب فى تضخم وزنى بالطريقة اللى عرفتوها عنى دى .. أما طبيخ مراتى حبيبتى فتحفتين تلاتة (ملحوظة : ما أقدرش أقول غير كده طبعاً ).. وده لانه واخد طعامة طبيخ حماتى ولكن بمعايير حديثة .. أرق .. بس أتحدى أى بنى أدم يقعد ياكل من أكل أى واحدة من التلاتة ... ويقوم من غير ما يكون عنده حالة من الإمتلاء والتخمة .. الأكل لذيذ بجد .. وتحس أنه كده أول ما بتحطه على لسانك بيخدر مراكز الإحساس بالشبع تماماً فى المخ .. فما تقدرش تقاوم .. وتلاقى إيديك بتتمد بطريقة أليه على كل الأطباق .. واحد ورا التانى .. من غير ما تقصد .. وفجأة تلاقى نفسك تنحت ومش عارف تاخد نفسك من كتر الأكل .. صدقونى .. أنا ساعات بأحتاج لفترة تهيئة عشان أقوم من على السفرة من عند أى واحدة من التلاتة .. كل ده وعاوزنى أكسبها .. ياخى .. ولا بلاش دى على رأى عمنا الكبير محمود المليجى
*****
المهم أنا أخدت الشيتوكال وسبت نفسى خالص .. مرة فتة هنا ومرة رقاق هنا .. ومرة شوية حلويات .. أخر استهبال والله .. ومرت على كده معظم أيام العيد .. ولحد ماخلصت الأجازة .. ورجعت الشغل تانى من يوم التلات .. ساعتها بس قررت انى أرجع تانى للرجيم وكفاية بقى هبل فى الجبل .. كان شريط الشيتوكال خلص تقريبا .. وكنت فرحان بنفسى قوى فى الفترة دى .. قال يعنى مش بألخبط قال ..
وجه يوم القياس .. صحيت الصبح نشيط كالعادة .. وبعد ما خرجت من الحمام مباشرة وقبل ما أفطر قررت أقيس محيط الخصر .. على فكرة .. ناس كتير قوى قالوا لى ان الرجيم مازورة مش ميزان .. وفى حالتى أنا ده صحيح جدا .. لان وسطى .. أو بمعنى اصح "كرشى" .. اكتر حاجة مؤرقنانى فى حياتى .. فرحت جايب المازورة وقست وفرحت قوى لما لقيت نفسى انى نزلت 3 سم بحالهم .. والله العظيم ما كنتش مصدق .. لدرجة انى قست مرة واتنين وتلاتة .. وحاولت أتأكد أكتر من مرة .. بس كل مرة بألاقى نفس النتيجة .. دعيت ساعتها من كل قلبى للى اخترع الشيتوكال ..وقلت بس هو ده الحل المثالى فى حالتى .. أنا لو مشيت عليه كده شهر ولا اتنين مع كل وجبة ملخبطة .. هاكون لخبطت بمزاجى و خسيت كمان .. أصل أنا عارف ان السنتى الواحد الأقل من الكرش بيكون معناه حوالى كيلو أقل فى الوزن .. وتوقعت انى لما أروح أقيس الوزن زى كل أسبوع هلاقى نفسى نزلت مش أقل من اتنين كيلو كده ..
وعشان كده رحت الصيدلية وأنا كلى تفاؤل وثقة .. ووقفت على الميزان مستنى النتيجة الرائعة للمجهود الرائع والجبار اللى أنا معملتهوش .. اللى عمله الشيتوكال .. بس النتيجة كانت فاجعة .. اكتشفت انى تخنت .. اه والله تخنت .. طبعا انتم متخيلين 100 جرام ولا حاجة .. لا .. للأسف لقيت نفسى تخنت كيلو و 600 جرام .. ودى كارثة بالنسبة لى .. وطبعاً لو ضفنا عليهم الـ 100 جرام بتوع الأسبوع اللى فات .. يبقى المجموع حوالى 2 كيلو .. 2 كيلو فى أسبوع .. دى مشكلة ..
