اليوم العشرون : هاموت وأنام

اليوم العشرون : هاموت وأنام 

عارف يعنى إيه انك تعمل رجيم وانت مش نايم .؟؟ يعنى ببساطة بتضحك على نفسك .. أو بتغلبها .. بس فى أغلب الوقت .. بتعذبها 

عارفين ليه ؟؟ لان قلة النوم بتخلى المخ يصدر إشارات غير صحيحة عن حالته .. ومراكز الإحساس بالجوع والشبع بتختل وبتصدر دايما إشارات خاطئة .. تخليك تحس انك عاوز تاكل طول الوقت .. وإنك مش بتشبع .. وكل ما بتبعد عن أخر وقت نمت فيه .. كل ما الجوع بيزيد حتى لو واكل .. 

الكلام ده على فكرة مش كلامى .. ده كلام مجموعة من الخبراء بيقولوا ان الواحد لو ما نامش على الأقل 6 ساعات للإنسان البالغ فى اليوم بيحصل له خلل وظيفى فى مراكز الجوع والشبع فى المخ .. وبيقدموا النصيحة دى لكل اللى بيعملوا رجيم عشان يحافظوا على نظامهم الغذائى بالمحافظة على عدد ساعات النوم فى كل يوم .. وطبعاً ده راجع ان خلايا المخ بتتجدد فقط أثناء النوم .. وبالتالى كلما طالت فترة الصحيان .. تبتدى تخرف بقى .. 

أنتوا طبعاً مستغربين ليه بأقول لكم الكلام ده .. أصل أنا جربت الموضوع ده بنفسى النهاردة 

دخلت امبارح أنا الساعة واحدة صباحاً وصحيت الساعة 4 الفجر عشان البنت كان عندها تدريب صباحى فى النادى قبل المدرسة .. أنا بصراحة مش عارف هى ازاى مستحملة تنزل المية فى الوقت ده .. دا لو كانوا قالوا لى فى الجيش أعمل كده يمكن ما كنتش رضيت .. المهم نزلنا من بدرى .. وبعد ما وصلناها رجعنا البيت عشان كان فاضل لسه وقت على ميعاد الشغل 

ما فطرتش قبل ما أنزل لانى كنت لسه واكل بالليل طبق خضار سوتيه .. فما كنتش جعان .. يادوب شربت مج النسكافيه عشان أعرف أفتح عيونى .. بس وأنا راجع بقى البيت الصبح لقيت عربية فول فى الشارع .. أنا بصراحة بحب فول العربيات قوى قوى .. له طعم تانى .. وبالذات لما يكون مشطشط وطعم الزيت الحار باين فيه جامد .. وياسلام بقى لو معاه بصلة وقرنين فلفل حاميين .. طبعا كان النوم .. أو بمعنى أصح قلة النوم بدأت تخلى دماغى تلف .. فقررت أفطر من الراجل ده عشان كنت بقيت جعان جداً .. وقلت مش مشكلة وجبة الفطار .. أول لما وقفت عنده ع العربية ما قدرتش أقاوم الريحة .. وطلبت منه 4 سندوتشات .. كتير مش كده ؟؟ .. كنت عارف والله انكم ها تضحكوا .. بس معلش .. المهم انى رجعت البيت وقلت هاكل اللى هاكله وأسيب اللى أسيبه .. بس ما حسيتش بنفسى إلا وأنا بأخلصهم .. والمشكلة انى كنت .. لسه جعان ؟؟ مش قلت لكم المراكز متلخبطة 

 نزلت الشغل .. واتلخمت حبتين كده وداريت جوعى بشرب مية كتيير .. وده على قد ما نفع شوية إلا أنه ما صمدش معايا .. ده طبعا غير انه خلانى أدخل الحمام كتير جداً النهاردة .. لدرجة إنى زهقت .. بس على الساعة 2 كده .. يعنى بعد حوالى 5 ساعات .. حسيت بالجوع تانى . .. 

كنت عامل حسابى بقى النهاردة و أخذت معايا م البيت سندوتشات جبنة فى عيش سن طرى .. أهه منه تغيير و منه كمان السن بيشبع .. أكلتهم وشربت بعديهم مية كتير تانى وعشان كده حسيت انهم سدوا معايا شويتين
بس لما رحت التليفزيون بقى لقيتهم جايبين سلطة جبنة و عيش ناشف من عند بابريكا .. والصراحة انها رغم انها سلطة جبنة عادية جداً ورغم ان العيش الناشف ممكن يكون موجود فى كل بيت .. بس طعم سلاطة بابريكا مختلف .. ليه مذاق خاص وخصوصاً لما يتوصوا بالشطة .. سبتهم .. تفتكروا .. طبعاً لأ .. ضربت معاهم شوية .. مش كتير صحيح بس فعلا ما كانش ليهم لازمة 

بالليل بقى .. كان عندى ميعاد مع أمى .. رحت لها البيت .. وقاومت الإغراء انها تجيب لى من أكلها .. رغم انها كانت عاملة فراخ مسلوقة .. بس أنا رفضت وده لسببين .. أولاً الإحساس بالذنب .. من كل اللى نيلته النهاردة .. وثانياً لانى كنت بجد ناوى أبطل أكل النهاردة كده .. ولما صمموا جابوا لى برتقالتين وكمان متقشرين .. وضربتهم من غير ما أحس برضه .. 

وقلت كده رضا بقى قوى .. بس اتفاجئت ان عندهم كاجو وكمان ذره محمصة ... منعت نفسى عنهم بالعافية .. أخدت واحة كاجو بالعدد و كبشة ذرة محمصة .. ومش عارف ان كان اللى عملته ده صح ولا غلط ..بس حسيت انى هفتان ومحتاج لهم .. وبرضه شربت مية كتير .. وربنا يستر بقى انى ما أفضلش رايح جا ى طول الليل ع الحمام 

المشكلة انى دلوقتى فى البيت وبجد هاموت وأنام .. خلاص حاسس ان بنزينى خلص خالص .. وبمناسبة البنزين برضه .. لسه حاسس بالجوع .. وحاطط جنبى علبة زبادى وشوية عيش سن مكسر .. تفتكروا أكلهم ولا أنام .... بأفكر أنام وأتلم بقى .. وانتم إيه رأيكم ؟؟ 

 خخخخخخخخخخخخخ