عشر خطوات للحفاظ على الريجيم فى المصيف

بدأ الصيف وبدأت أجازاته وطبعا فى الصيف لازم نحب ..

 قصدى لازم نصيف طبعاً.. وللأسف مع المصيف بتحصل لخبطة فى الريجيم .. لأن اللمة بتأكل وجو البحر وهواه وميته بتفتح النفس دا غير اجواء البهجة اللى بتفرض نفسها ع الكل.

ومن أهم الحاجات اللى بتخلى الريجيم يبوظ فى المصيف اختلاف عاداتنا اليومية عن طبيعة أيامنا العادية من بحر وصحيان بدرى ونوم متأخر وهوا وشمس ومية.. وكمان وجود أكتر من شخص فى السفرية الواحدة كل واحد له ترتيبه ونظامه الغذائي المختلف. كل دى حاجات بتخلينا نلخبط ونرجع من الاجازة بعدد اكبر من الكيلوات ونرجع نزعل ونندم 😒😒

طب نعمل ايه علشان نحافظ على الريجيم فى المصيف ؟؟ 

تعالوا نحط خطة بسيطة علشان نقلل من الاثار السلبية للخبطة فى المصيف وفى نفس الوقت نستمتع قدر الامكان بدون خساير كبيرة

عشر خطوات للحفاظ على الريجيم فى المصيف

اولا : تقليل النشويات والسكريات فى وجبة الفطار

وجبة الفطار يفضل ما تحتويش على كمية كبيرة من النشويات والسكريات ويفضل يكون فيها بروتين اكتر زى الفول والبيض وطبعا السلاطة عنصر مهم جدا علشان يتناسب مع المجهود بتاع طول اليوم.

ثانياً: استخدام الفاكهة والزبادى كوجبة فى وسط اليوم

نعمل طبق سلاطة فاكهة كبير كده وحلو ومحترم ونطعمه بالزبادى ويفضل الزبادى اليونانى علشان فيه خماير أكتر بتساعد على الهضم.. ومافيش مانع لو نضيف على الوجبة كام معلقة شوفان علشان يزود الشعور بالامتلاء والشبع.

ثالثاً: بالنسبة لوجبة الغدا يفضل لو ركزنا على المشويات وياسلام لو عملنا حفلة شوا ع الفحم ومعاها طبق السلاطة العظيم بكل مكوناته الغنية بالاملاح والمعادن المفيدة والالياف الطبيعية. هاتشبع وهاتملا الدنيا بهجة وفرح.

رابعاً: ممكن وجبة الغدا يبقى فيها نشويات؟؟

ممكن طبعا بس بشرط عدم الافراط وطبعا النشويات مهمة زى الرز والمكرونة والعيش علشان ناخد منها طاقة تساعدنا على التمتع بجو المصيف اللطيف وتحمل مجهوده الكبير بس ماينفعش تبقى لوحدها علشان ماتعملش كسل فى الامعاء وكمان علشان هى بتتهضم بسرعة وبتدى احساس سريع بالجوع وطبعا الواحد فى المصيف كده كده بتبقى نفسه مفتوحة طبيعى

خامساً: المشى والمجهود البدنى

المشى والمجهود البدنى فى المصيف مطلوب جدا علشان تبقى فرصة اننا نزود الحرق ونستفيد من المصيف فى تقليل الدهون فى الجسم. وطبعا المشى بعد الغدا وخاصة فى ساعة العصارى وقبل الغروب ممتع جدا ومفيد للصحة بشكل عام.

عشر خطوات للحفاظ على الريجيم فى المصيف

سادساً:المشروبات والمية

من اكتر الحاجات اللى بتبوظ الدنيا فى المصيف الاستهبال فى شرب العصاير والمشروبات الغازية .. ياريت نسيطر على الموضوع ده ونحاول اننا نستبدلها بالمية.. المية يا جماعة اهم حاجة فى المصيف لان المية بتعوض الفاقد لللى بيروح نتيجة زيادة النشاط البدنى والاملاح اللى بتفقد بسبب الحر والرطوبة وملوحة الجو. دا غير انها بتساعد على الهضم والتخلص من الاملاح الزيادة عن حاجة الجسم وبتزود نشاطه.

واذا كان ولابد نشرب مشروبات غازية ياريت نخلينا فى المشروبات الدايت او منخفضة السعرات.

سابعاً: وجبة العشاء لازم ماتبقاش تقيلة خاصة لو متأخرة ولان الصيف بيحب السهر فالافضل اننا نخلى وجبة العشاء فى الوقت المتأخر تكون فاكهة فقط. بعيدا طبعا عن المانجة والتين والبلح والعنب والكاكا. ممكن موز وتفاح وكمترى وكيوى وبطيخ وشمام أو اى فاكهة تانية نحبها. دى هاتعوض لنا الاملاح والمعادن اللى الجسم محتاجها وهاتدينا نوم هادى علشان نصحى تانى يوم فى نشاط وحيوية 

ثامناً: توقيت النوم والصحيان

ياريت نحاول ما نغيرش النظام اللى متعودين عليه فى حياتنا اليومية العادية وخصوصا فى مواعيد الصحيان والنوم. علشان ده بيكون له تأثير كبير فى لخبطة نظام الجسم واللخبطة دى بتأثر على معدلات الحرق وبالتالى مش بيخس. لو حافظنا على مواعيدنا الجسم مش هايتلخبط ولا هايعانى وهاتستمتعوا أكتر بالمصيف

تاسعاً: التدخين ممنوع

احياناً المدخنين فى المصيف بيزودوا من التدخين لاحساسهم بالانطلاق .. ياريت بلاش نزودها فى المصيف بحجة ان الجو جميل وكده وياريت لو نبطل تدخين اصلا لانه فعلا بيأثر على كل وظايف الجسم وبيزود كثافة الدم وبيقلل حرق الدهون والسكريات فى الدم نتيجة لقلة الاكسجين وبالتالى بيأثر على اى نظام غذائى بنعمله.

عاشراً: الاتفاق والتوافق العائلى

صعب قوى اى حد يعمل ريجيم لوحده او وسط ناس مصرين على اللخبطة. لو اتفقنا كعيلة على انواع الاكل اللى هانعملها خلال المصيف من قبل السفر ونحط بدايل ما تبوظش الدنيا بيكون أفضل كتير وبيقلل فرص اللخبطة اللى بتبوظ نظام الريجيم. دا غير ان التخطيط الجيد للمصيف بيعتبر الوجبات احد اهم الحاجات اللى بتساعد على الاستمتاع بالمصيف واجازة الصيف

عشر خطوات للحفاظ على الريجيم فى المصيف

باختصار الريجيم فى المصيف مش صعب بس محتاج شوية نظام وتوافق وشوية عزيمة واراده ووعى تعالوا نجرب سوا واحكوا لى عن تجاربكم... اجازة سعيدة 😊😊😊

باظت ‏الطبخة ‏على ‏صاغ ‏ملح

جدتى دايما زمان كانت تقول المثل ده. "باظت الطبخة على صاغ ملح: وده تعبير فطرى زكى عن الحاجة الحلوة اللى ما بتكملش وبتبوظ على اسباب تافهة وعبيطة. 

زى ما حصل تمام النهارده مع حبايبنا "ولاد المصريين" ابطال منتخب مصر فى كرة اليد.. الولاد بصراحة اجتهدوا من اول البطولة بشكل استثنائى لدرجة انهم رفعوا سقف الطموحات عندنا لأعلى درجة. وبقينا شبه مطمنين ان الكاس بقى فى جيبنا .. مش كفاية ان البطولة على ارضنا كمان!! 

لحد ما جه ماتش النهارده.. الولاد بقوا مرتبكين ومتوترين وبيعملوا اخطاء فى منتهى السذاجة وفى أوقات قاتلة .. زى حكاية التبديل الخاطىء وكمان زى الرمية الجزائية اللى جت فى اخر تلات ثوانى فى المباراة علشان تقلب النتيجة بشكل كامل وتودينا فى حتة تانية خالص. 

رشة ملح بصاغ بوظت التعب الكبير اللى عملوه علشان يعوضوا الفرص اللى ضاعت بسذاجة لا تصدر عن مجموعة هواه مش محترفين فى اغلى اندية العالم.

الولاد بصراحة كانوا تحت ضغط عصبى ونفسى كبير قوى .. مش عشان هايواجهوا بطل العالم انما علشان تحملوا مسؤولية اسعاد كل المصريين اللى أمنوا بيهم ووقفوا فى ضهرهم. وعلشان كده جت الاخطاء بسبب الارتباك والتردد والرغبة القوية فى المكسب والفرحة والمسؤولية الكبيرة اللى شكلت ضغط كبير على أعصابهم.

اللى حصل مع ولادنا الابطال دول هو بالظبط اللى ممكن يحصل معانا واحنا بنعانى من الحرمان فى اى ريجيم بنمشى عليه.. وخصوصا لما نبتدى نقرب من النتايج المطلوبة ولما تطول المدة ويزيد الضغط فنبدأ عند اول مشكلة نفسية أو ضغوط فى الشغل او البيت نتوتر ونبتدى نقع فى التجاوزات واللى بدورها بتضغط هى كمان على اعصابنا وتخلينا نغلط اكتر ونعك اكتر واكتر.

وعلشان كده لازم الواحد يحاول يبعد عن الضغوط وما يستسلمش لها بالشكل اللى ممكن يوصله انه يفقد هدفه واتجاهه وتروح منه الفرص ويضيع مجهود كبير كان اولى بيه انه يحافظ عليه.

عامة العايط ع الفايت نقصان عقل ومفيش فايدة م البكا ع اللبن المسكوب .. تعالوا ننسى العك اللى حصل ونبتدى من جديد على مية بيضا.

الجسم السليم .. فى العقل السليم

 طول الوقت عشت بافكر فى شكلى المثالى ، وكان هاجس القوام المثالى دايما بياخد حيز كبير من تفكيرى .. وأنا صغير كنت كل يوم بالعب تمرينات فى البيت علشان أنا مولود أصلا عندى استعداد طبيعى للسمنة، وحاولت أقاوم كتير انى اعمل رجيم وأنا صغير ونجحت فى أوقات وحققت شكل جميل بعد مجهود كبير

لكن كل مرة كنت باوصل للشكل المثالى - مش الوزن المثالى - كانت بتحصل لى انتكاسة .. وافضل شوية كويس لكن أرجع اتخن تانى والمشكلة الأكبر انى ما كنتش باحس بالموضوع ده بدرى .. ماكنتش باخد بالى إلا لما ألاقى العملية ضربت منى من كل ناحية .. فأبتدى تانى فى موضوع الرجيم من أول وجديد ويبدأ تانى العذاب مع الجبنة القريش والبيض المسلوق والخس والسلاطة والزبادى

كتير كنت بانجح لكن فى مجمل أيام حياتى أنا تخين بصراحة ووزنى فوق العادى .. بس اتعلمت كتير من الرحلة البندولية دى مابين التخن والرجيم .. اتعلمت حاجة مهمة قوى .. ان الرجيم الصح لازم يبدأ من عقلك مش من بطنك .. لازم تكون نفسياً كويس ومتزن علشان تقدر تعمل نظام تمشى عليه 

بالفعل الحالة المزاجية هى أهم حاجة فى موضوع الدايت .. ولازم الواحد يكون مظبط نفسه نفسياً علشان يقدر يعيش كويس والحقيقة دى اكتشفها كل أطباء علم النفس اللى اهتموا بدراسة مشكلات السمنة المفرطة تحديداً وكمان دكاترة الأنظمة الصحية .. وده لان الجسم فى حالات الإكتئاب بيسعى بشكل لا إرادى للمأكولات اللى بتزود هرمون الدوبامين فى الدم واللى بتسبب السعادة ودى بتيجى مع الحاجات اللى فيها نسبة عالية من السكريات والنشويات .. يعنى أنا مثلا لما باكتئب باجيب أكبر حلة عندنا واعمل فيها كيسين مكرونة سباجتى وأحط عليهم رشة زبدة محترمة وشوية فلفل أسمر وملح بقى وياه ياه ياه ع السعادة اللى بابقى فيها بعد الطبق ده . صحيح باقعد كتير مش فاهم حاجة بعدها .. بس بكون مبسوط والواقع انى مش باكون مبسوط علشان أكلت حاجة باحبها .. دى كلها هرمونات بس 

يبقى علشان نبتدى صح لازم تكون فسيتنا صح ..ولازم نبدأ من العقل قبل البطن .. لان اللى نفسيته كويسة هايقدر يخطط صح لحياته وهايقدر يتحرك أكتر ويشغل نفسه بحاجات أهم من الأكل اللى بيملا الوقت فى الفراغ 

أعداء الجسم الحقيقين هما الإكتئاب والفراغ ولازم الواحد يحاول يتخلص منهم علشان يقدر يعيش كويس .. وكمان يخس. 

وخدوا بالكم هى دايرة .. تكتئب فتتخن فتكتئب أكتر فتتخن أكتر .. وياريت ما نشغلش نفسنا كتير بموضوع القوام المثالى ده لانه وهم لان ربنا ما خلقناش زى بعض .. وكل واحد جسمه مميز فى ذاته .. احنا بس بنحاول نعيش أحسن ومانخطيش الحدود اللى تعطلنا عن ممارسة حياتنا الطبيعية بسعادة وانفتاح .. ويبعدنا عن الأمراض 

تعالوا نحكى تجاربنا لبعض ونشوف سوا هانوصل لفين .. لان المتعة فى الرحلة أكتر منها فى الوصول 

مستنى تجاربكم واستجابتكم ونرجع تانى نتكلم ونقول ونفيد بعض 

يالا مين هايبتدى ؟