اليوم السادس والثلاثون : تخاريف صيامى

اليوم السادس والثلاثون :  تخاريف صيامى

           مساء الخير يا أصحابى .. والله وحشتونى بجد .. مش مصدق انى بقى لى 6 أيام ما كتبتش لكم أى حاجة .. بس ياترى حد افتقدنى ؟؟ مش حاسس .. مش عارف اصلا ان كان حد بيقرا لى ولا لأ .. عموما أنا مبسوط انى بأكتب وبأخرج كل اللى جوايا .. وفى الفترة اللى فاتت انا كنت متضايق جدا انى مش بأكتب لكم .. كنت حاسس ان فيه حاجة كبيرة قوى ناقصة فى حياتى .. 

 

 طبعا هاتستغربوا انى النهاردة باكتب لكم اليوم السادس والثلاثون .. مع ان أخر مرة كان اليوم التلاتين بس .. وده لانى قررت انى أحسب الأيام اللى عدت من ايام الرجيم .. وهاحكى لكم عليها دلوقتى حالا 

            

هى ما كانتش مختلفة كتير عن اليوم التلاتين .. كان كلها لخبطة فى لخبطة .. بس بصراحة انا حاولت اوزن الأمور فى الصيام بس ما عرفتش .. صعب قوى انك تبقى صايم وسط ناس كلهم فاطرين .. وانت شايف كوبايات الشاى ومجات النسكافيه عمالة تتفسح حواليك يمين وشمال .. الأكل مش مهم والله مهما كنت بأحبه بس النسكافيه بجد بيفرق معايا .. والناس فى الشغل مالهمش ذنب انى صايم .. وما أقدرش الومهم والله .. بس باجى ساعة الفطار بيكون السكر نقص ع الأخر وما بأقدرش أخد قرار سليم .. وعشان كده بيكون الفطار ملخبط خصوصاً ان الأكل فى الشارع معظمه لخبطة .. اصلى بصراحة ما حبيتش قوى المرة اللى فطرت فيها على تونة .. كانت باردة وما حسيتش انى أكلت .. وكانت البدايل المتاحة من فراخ مشوية أو كفتة مشوية بيبقى معاها عيش .. والجوع كافر بقى .. صعب مقاومته .. وعشان كده انا لخبطت شويتين الأسبوع ده فى الفطار دايما والسحور أحياناً 

 

إيه الأخطاء اللى انا عملتها الأسبوع ده ؟؟

           ببساطة كده كان عندى غلطة اساسية هى عدم وجود خطة واضحة ومنظمة لاختيار من بين بدايل دايتاوية للأكل .. وده بسبب وجودى بره البيت معظم الوقت وبصفة خاصة ساعة الفطار بأكون فى الشارع .. وعشان كده مش بأقدر أختار اختيارات صحيحة .. هاجيب منين أكل دافى وصحى ومفيد فى خمس دقايق قبل الفطار .. 

بس الغلطة التانية كانت انى كنت بألخبط فى السحور .. وهى دى المشكلة .. صحيح انا ما عملتش ده فى كل الأيام .. بس كان بيحصل .. ودى غلطة كبيرة عشان كنت بأتسحر بدرى وبأنام .. زى ما قلت لكم قبل كده مش بأقدر أفضل صاحى للفجر لانى بأصحى أصلا بدرى من أول اليوم 

 

طب ما عملتش حاجة كويسة خالص يعنى الأسبوع ده ؟

لا عملت .. حاولت انى ما ألخبطش وسط الوجبات ..يعنى ... و فضلت ملتزم بعدم شرب المشروبات الغازية .. وشربت شاى أخضر فى بعض الأيام .. وكمان بعدت عن الشوكولاتة والحلويات إلا فيما ندر ..قاومت كتير انى ألخبط فيهم 

 وكمان الحاجة اللى عملتها كويسة انى كنت بأشرب مية كتير قوى .. عشان أعوض الصيام وفى نفس الوقت أساعد فى الرجيم .. 

ومن ناحية برضه كنت بأحاول أكل فاكهة فى السحور .. أحيانا كنت بأنجح وأحيانا كانت عينى بتزوغ على عيش السندوتشات الفينو الجميل أبو سمسم  ..

طب ونتيجة ده إيه عليا؟؟ 

          عشان اعرف نتيجة اللخبطة دى كلها قررت انى أجرب أقيس يوم الأربع بدل الخميس .. لان يوم الخميس هايكون الوقفة وكل سنة وانتم طيبين وغالبا هافطر عند أمى وعشان كده مش هاينفع أروح أقيس وخصوصا ان أكيد هايبقى فيه لخبطة 

          وعشان كده قررت انى أروح أقيس امبارح الأربع .. عشان أعرف اللخبطة اللى نيلتها طول الأسبوع دى كان تأثيرها إيه .. واكتشفت المفاجأة 

        والحمد لله كانت مفاجأة سارة .. لقيت نفسى رغم كل اللخبطة دى ما زيدتش غير 100 جرام بس .. وده معناه كويس قوى بالنسبة لى .. علشان عندى لسه إصرار انى اكمل ... وان المدة اللى  فاتت كنت بأنزل بأسلوب مفيهوش ضغط على جسمى ولا قهر ليه وعشان كده الرجوع كان صعب عليه لانه تقريباً مش محروم قوى .. الحمد لله ان الخطة نجحت وجابت فايدة فى الأيام العصيبة .. 

الخبر الحلو اللى عاوز أقوله لكم انى قررت اكمل الرجيم .. وأكمل الكتابة .. حتى لو ما كنتوش بتقروا لى اللى بأكتبه .. أو على الأقل حتى لو ما كنتوش بتعلقوا عليه .. عشان تحسسونى بالمشاركة .. قررت أكمل وقررت اساعد نفسى الفترة اللى جاية بحاجتين مهمين قوى 

الحاجة الأولانية : الرياضة .. وهاكتب لكم فى اجازة العيد دى برنامج رياضى فى منتهى الجمال .. والبساطة هايعجبكم قوى .. وممكن يتنفذ فى البيت ..

أما الحاجة التانية انى قررت أساعد الرجيم وخصوصا فى العيد من خلال بعض الأدوية اللى بتساعد على التخسيس ودى ليها أنواع كتير هاكلمكم عليهم فى مرة جاية ان شاء الله بالتفصيل