اليوم السابع عشر : اللقمة بتنادى أكالها

اليوم السابع عشر : اللقمة بتنادى أكالها 

بتشديد الكاف .. زى ما كانت ستى بتقولها .. ده اللى حصل معايا النهاردة بالظبط .. أحكى لكم اليوم من أوله 

            الأول صحيت بدرى عشان البنت كان عندها تدريب صباحى كالعادة .. فطرت رغيف سن واحد مع شوية جبنة وطماطم ومج النسكافيه .. ما كنتش قادر أكل أى حاجة رغم انى ما اتعشيتش امبارح غير الجوافة .. بس الظاهر ان المكرونة والجوافة الإتنين قفلوا مع بعض .. كنت حاسس بالشبع والإمتلاء حتى الصباح .. وعشان كده ما عرفتش أفطر .. كان ممكن أفطر فى الشغل .. بس ما حبتش ألخبط فعشان كده أكلت السن بالجبنة مع النسكافيه قبل ما أنزل 

المهم رجعت البنت للبيت وتحركت ع الشغل .. كان عندى النهاردة مونتاج .. وقعدة المونتاج بعيد عنكم مملة قوى وبتجوع .. بس أنا صمدت ..واللى ساعدنى ان النهاردة عشان أجازة ما كانش فيه حد يجيب أى حاجة من برة التليفزيون .. وكان المتاح هو شغل الكافتيريات الرخيصة بقى زى الشيبسى و الشوكولاتة والبسكوت وكبيرهم شوية بيبسى وشاى ونسكافيه .. كانت  زميلتنا المونتيرة الماهرة سهير فهمى كانت مصممة تعزمنى على حاجة بس أنا ما رضيتش عشان ما أبوظش الدنيا .. اكتفيت بمج نسكافيه تانى ولما صممت أخذت منها صوباعين ويفر صغننين

          بس المونتاج أخد وقت أكبر من حجمه .. كنت عامل حسابى انى أروح ازور أمى النهاردة ..حيث انه اليوم الوحيد اللى ما عنديش فيه شغل بعد الظهر ..  وكانت هى كمان عارفة انى رايح .. بس لما إتأخرت قررت انى ما أتغداش عشان الدنيا ما تبوظش قوى لاننا خلصنا بعد المغرب .. والمفروض ان الواحد ما ياكلش حاجة بعد المغرب إلا لو فاكهة أو زبادى بس .. وقلت لما أروح هناك بقى أبقى أخد تفاحة أو كوباية زبادى بس .. 

           لكن لما رحت لها .. لقيتها ياحبيبتى .. عاملة حسابى فى فراخ مشوية من عند تكا .. وده عشان ما تبوظليش النظام ومعاها كمان خضار سوتيه .. وجايباهم مخصوص على حس زيارتى ليها 

 ياعينى ع الأم .. وحنان الأم .. لا خال ولا عم .. بيشيلوا الهم .. ياعينى ع الأم

ربنا يخليها لى يارب ويطول لى فى عمرها ويديها الصحة والبركة والرضا 

المهم طبعاً قصاد الإغراء ده ما قدرتش أقول لأ .. ده حتى مايبقاش عندى دم لو قلت لأ .. فأكلت ..

هو صحيح الأكل المشوى فى العشا مش مضر .. طالما انك كمان مش هاتنام بعد الأكل على طول .. بس أنا كنت أفضل أنام أخف من كده .. لكن الحمد لله .. وصدقت ستى لما قالت .. اللقمة بتنادى أكالها 

من الأخطاء الخطيرة اللى أنا عملتها النهاردة فى الرجيم انى ما شربتش مية كتير .. مش عارف ليه رغم أنى أخذت معايا إزازة كبيرة معدنية وأنا طالع الشغل .. بس كانت سخنة .. وده غلط ان الواحد مايشربش طول اليوم .. وعشان كده أنا دلوقتى عطشان جداً وعمال أشرب زى الفيل .. وده برضه مش صح .. لانه هايخلينى أنام بأرق وكل شوية أقوم أزور الحمام .. 

وبرضه النهاردة ماشربتش ولا كوباية شاي أخضر .. وده مش صح.. المفروض الواحد يشرب 3 فناجين فى اليوم

وكمان كان لازم اعمل حسابى بعد كده لما يكون عندى مونتاج فى شوية فاكهة فى كيس كده أخدهم معايا م البيت .. أهم يصدوا برضه عشان الواحد ما يجوعش قوى ويخرف ويهبل فى الأكل 

بس برضه من الحاجات الكويسة انى بدأت تمارين شد البطن زى ما هى موصوفة فى صفحة "مشكلة الكرش" .. قريتوها ولا لأ؟؟ .. ربما تجيب نتيجة .. وهابقى أحكى لكم

أما الأكل المشوى بالليل فليس عليه أى غبار .. بس البعد عنه أفضل وأريح للمعدة 

المشكلة انى دلوقتى نفسى فى حاجة حلوة .. اعمل إيه أنا بقى دلوقتى ؟؟ أنام أحسن مش كده ؟؟ .. تصبحوا على خير

اليوم السادس عشر : الأكل بإفترا

اليوم السادس عشر : الأكل بإفترا

           طبعاً انتوا عارفين ان النهاردة اليوم الفرى بتاعى .. وأنا حاسس انى أستاهله بجد .. عشان نجحت انى أنزل 2.4 كجم الأسبوع اللى فات رغم ان حركتى كانت محدودة إلى حد ما بسبب وجع رجلى اللى لسه مش لاقى له حل .. وعشان كده قررت النهاردة انى أكل كل اللى نفسى فيه .. 

       أول لما صحيت الصبح .. طلعت كيس العيش الفينو الفاخر اللى كنت جايبه معايا أمبارح وأنا راجع بالليل .. واديناها جبنة شيدر و لانشون .. وشربت الشاى .. أكلت كتير .. حوالى رغيفين .. ودى حاجة غريبة هاقول لكم عليها بعدين .. المهم نزلت مع بنتى التمرين الصباحى بتاعها .. وما أكلتش أى حاجة .. بس طلبت قهوة مظبوطة .. ولما رجعنا البيت إديتها شوكولاتاية سنيكرز اللى بأموت فيها فى انتظار الغدا .. 

 وطبعا عشان النهاردة الجمعة أنتخت شويتين .. اتفرجت ع التليفزيون شوية وتابعت الفيس شوية .. وبعدين نمت لغاية ما صحونى ع الغدا .. احساس جميل جداً أنك تصحى من النوم تلاقى الأكل ع السفرة .. بجد بأحب الإحساس ده قوى .. وخصوصاً لو كان الواحد جعان .. ودى المشكلة .. و هاقول لكم ليه 

           الغدا النهاردة إختلفنا عليه .. بس أنا طلبت منهم انهم يعملوا لى المكرونة الإسباجتى اللى بأحبها .. وعليها رشة سمنة و شوية ملح مع طبعا أصابع الفرانكفورتر الشهية .. وعليها شوية كاتشب .. أنا بأموت فى الأكلة دى على بساطتها .. وأكلت منها وانبسطت .. ع الأخر .. بس برضه كان فيه حاجة غريبة 

عارفين إيه الحاجة الغريبة .. انى بقيت أشبع من كميات أقل .. أنا فاكر قبل ما أعمل الرجيم كنت بأضرب مثلا حوالى 4 أرغفة فينو قبل ما أبتدى أحس بالتخمة .. أما المكرونة فكنت بأضرب الكيس كله لوحدى أحياناً .. وبالذات بالليل .. بس النهاردة أكلت كتير ده صحيح بس مش زى ما كنت متعود قبل كده .. ومش زى ما كنت كمان متوقع .. حاسس انى شبعت .. ودى حاجة رائعة .. لان ده معناه ان الواحد بطنه ابتدت تتعود على الرجيم على فكرة .. 

نسيت أقول لكم انى النهاردة بعد الغدا ضربت حتة بسبوسة معقولة .. ودى بصراحة أكلتها طفاسة بس عشان ما يبقاش فى نفسى حاجة الأسبوع اللى جاى .. المشكلة انى حاسس انى عاوز أكل تانى من الحاجات اللى هانحرم منها طول الأسبوع .. بس أنا التزمت مع نفسى ان اليوم الفرى يبقى فى أول وجبتين بس .. أما وجبة العشا فهاتكون زى باقى أيام الأسبوع 

النهاردة فى العشا هاضرب جوافة .. حد ياكل معايا جوافة؟؟

على فكرة .. ماتتقلوش قوى من الجوافة فى الرجيم عشان بتعمل امساك .. والإمساك بيحصل طبيعى فى الرجيم .. فمش ناقصة .. وخصوصاً انه من أهم أعداء الرجيم الصحى .. هى لذيذة آه .. بس خدوا بالكم .. تصبحوا على خير

اليوم الخامس عشر : يوم القياس

اليوم الخامس عشر : يوم القياس

              النهاردة كان الرجيم ماشى كويس قوى .. عكس العك اللى عكيته امبارح ده .. معلش أهو يوم وعدى .. بس النهاردة بقى احترمت نفسى جداً .. أكلت الصبح رغيفين سن صغيرين ومعاهم جبنة ملح خفيف و بيض مسلوق .. وشربت مج النسكافية التمام .. أما الغدا واللى للأسف كان متأخر شوية فكان فراخ مشوية بس .. ومن عند" على عيد " 

طبعاً أصحابنا بس اللى شغالين فى التليفزيون هايعرفوا مين هو على عيد ده .. ده واحد فاتح جنب التليفزيون من زماااان قوى .. وعينا ع الشغل لقيناه .. لازم كل واحد يشتغل فى التليفزيون ياكل من عنده ولو مرة واحدة ع الأقل .. هو محل صغير قوى متخصص فى الكفتة والطرب والفراخ المشوية .. وعلى قد ما أكلنا من عنده طول السنين اللى فاتت دى كلها .. ما جربناش ولا مرة ناكل من عنده مكرونة فرن ولا رز... وعلى قد ما برضه ما بيعديش أسبوع واتنين إلا ونكون واكلين من عنده تانى .. إلا اننا كل مرة بنشك فى نوعية اللحوم والطيور اللى بيقدمها لنا .. بس بصراحة .. الصحة ما قفلتوش ولا مرة .. والأكل من عنده لذيذ جداً .. 

ملحوظة بعد أول 4 مرات .. طبعاً هاتسألونى ليه بعد أول أربع مرات ؟ .. هاقول لكم ان دى فترة التعود لمعدة حضرتك عليه .. لانك بعد كل مرة فى المرات الأربعة الأولى أكيد هايجيلك إسهال و مغص ودوخة غريبة .. بس هاترجع له تانى لحد ما معدتك تيأس من الشكوى وتتعود .. والله الموضوع ده حصل معانا كلنا .. واللى مش مصدق يسأل ... واللى ما حصلش معاه يقول لى .. بالمناسبة .. كان عندنا واحدة زميلتنا ربنا يمسيها  بالخير بقى كانت مسمياه على مناسبة لانها فى يوم حاولت تفتكر اسمه وماقدرتش فقالت هو اسمه حاجة كده على مناسبة .. ومن ساعتها أحنا فى صحابنا الضيقين مسميينه كده 

           المهم انى أكلت من عنده النهاردة ومامديتش إيدى على سلطة الطحينة الجميلة اللى كانت مع الأكل وما أكلتش من العيش أكتر من ربع رغيف وش بس .. صحيح قمت جعان .. بس أحسن .. أصل أنا كان فيه موضوع تانى خالص شاغلنى .. أصل النهاردة ميعاد القياس .. بصراحة كنت خايف جداً .. وأهلت نفسى انى هلاقى نفسى زى ما أنا .. أصل أصحابى مديينى الإحساس انهم مش شايفين عليا أى تغيير .. ويمكن عندهم حق .. عشان مشكلة الكرش

  أصل أنا عندى كرش بارز شويتين وهو ده مشكلتى الحقيقية فى الرجيم .. وسر عذابى .. لانى كل مرة بأقدر أخس فى كل جسمى بس كرشى مش بينزل إلا فى الأخر بعد ما أكون زهقت .. وعشان كده بأرجع تانى .. وهو برضه أول حاجة بترجع فيا .. وعشان كده أنا عملت فى المدونة دى صفحة مخصوصة لنصايح مفيدة جدا فى علاج الكرش .. ها حاول أمشى عليها الفترة اللى جاية ونشوف مع بعض إيه اللى هايحصل

نرجع تانى لموضوع القياس 

        رحت النهاردة للأجزخانة اللى كنت قست فيها المرة اللى فاتت .. عشان أضمن توحيد عوامل القياس .. ووقفت برضه ع الميزان .. بس المرة دى ما كنتش مكسوف زى المرة اللى فاتت .. وطلعت الورقة .. لقيت نفسى خسيت .. اه والله خسيت .. بس مش خمسة كيلو زى المرة اللى فاتت .. المرة دى خســيت 2.4 كجم بالضبط وده فى حد ذاته إنجاز .. وبأعتبر نفسى ماشى صح جدا .. وأنا كده مبسوط قوى .. 

الحمد لله خطتى نافعة .. وأتمنى تكونوا انتم كمان مستفيدين منها .. وبرضه إحقاقا للحق يعنى .. بأشكركم لانى لو ما كنتش بأكتب لكم وانتم بتقروا لى ما كنتش كملت من أول يوم .. 

الحمد لله .. وبكره بقى اليوم الفرى .. صحيح انا هبلت شوية الأسبوع اللى فات يوم الأربع .. بس معلش .. ملحوقة .. تتعوض والأيام جاية كتير .. المشكلة دلوقتى .. انى عاوز أبتدى اليوم الفرى من دلوقتى .. بس بأقاوم .. ادعوا لى ما أتهورش وأمد إيدى على أى شوكولاتاية من بتاعت بنتى اللى متنطورة فى الشقة فى كل حتة دى .. يارب أصمد للصبح .. تصبحوا على خير

اليوم الرابع عشر .. الجوع كافر

اليوم الرابع عشر .. الجوع كافر

            حقيقى الجوع كافر .. والنهاردة أنا اختبرت الإحساس ده والمعلومة دى .. بصراحة امبارح كان عندى أرق .. وما قدرتش أنام قبل الساعة 3 صباحاً .. وما كنتش حاسس ان الوقت بيعدى .. وما كانش فيه سبب منطقى للأرق ده .. بس كنت صاحى وبس .. وياريتنى حتى كنت بأعمل أى حاجة مفيدة .. المهم انى الصبح النهاردة ما صحيتش بدرى خالص .. وكان لازم أنزل .. وأكتر من كده راحت عليا نومة كبيرة .. فصحيت قبل ميعاد النزول بـ 20 دقيقة بس .. ما لحقتش أكل ولا أجهز أى حاجة خالص .. نزلت على معدة فاضية من البيت .. وطبعاً كنت مش واكل من بالليل غير البرتقال .. فكنت حاسس جداً بالجوع .. وفضلت على كده لحد ما وصلت المكتب .. وعشان ما فطرتش كان لازم نفطر كلنا مع بعض...

           ساعتها ما كانش ممكن أقول لهم عاوز جبنة قريش و توست .. كلهم هاياكلوا فول وطعمية .. ها سرح أنا بقى لوحدى كده .. المهم الجوع خلانى أطلب 4 سندوتشات .. اصل بصراحة المطعم اللى جنب الشغل بيعمل السندوتشات فى عيش بلدى .. السندوتش نص رغيف .. طلبت ما إجماليه رغيفين .. فول وطعمية وبطاطس .. وكلت

وطبعاً لان بقى لى فترة كبيرة ما أكلتش فطار جامد كده .. حسيت بالتخمة الشديدة .. وقررت انى .. بما أنى أكلت متأخر .. مفيش داعى أنى اتغدى بقى .. وخليها عشا على طول عشان ما أبوظش الدنيا أكتر من كده ..

بس الظاهر ان الواحد لما بيفلت منه حاجة بيهون عليه كل حاجة وبتنهار المقاومة تماماً ..وخصوصاً لما يكون فيه ضغط شديد .. وانا النهاردة وقعت تحت ضغط عصبى شديد جدا بسبب موضوع انتم فى غنى عن سماع تفاصيله .. فبصراحة وده الإعتراف التانى النهاردة .. جه قدامى الرغيف البورى بتاع تكا .. ومعاه علبه ثومية تجنن .. وما حسيتش بنفسى إلا لما خلصت الرغيف كله ..كأنه نوع من تفريغ الطاقة والغضب ..  أنا عارف انه بيبقى مليان زيت وغلس .. بس بأحبه وبأحب طعمه وكان واحشنى .. يالا مرة وعدت

المهم .. النهاردة اتعلمنا درسين من اللى حصل ده ..

الدرس الأول :

ماينفعش تنزل من البيت من غير ما تفطر فطار عليه كنترول .. حتى لو كان كتيير بس يجب السيطرة عليه .. ويجب عدم ترك الجوع يتملك من الواحد لانه ساعتها بيسيطر تماماً على التفكير خاصة فى حالة الناس اللى زى حالاتى .. متعودين ياكلوا براحتهم

ولو حصل بسبب أى سبب يجب التريث فى الإختيار مع شرب الكثير من المية عشان نحس أكتر بالشبع

الدرس الثانى:

ان الواحد ما ينفعش يسيب نفسه يغضب قوى وينفس عن غضبه بالأكل .. لان ده ها يخليه ياخد قرارات غير سليمة .. وبالمناسبة فى حالة الغضب كيميا الجسم بتختلف وبالتالى الأكل ممكن يكون له تأثير سيئ على الجسم حتى لو كان سليم ومظبوط

المهم هانعتبر النهاردة سقطة وعدت .. ومش ها تعشى وهاعتبر ان اليوم كده فله قوى .. ويمكن لو جعت قوى أخد تفاحة ولا حاجة .. بس أكتر من كده لأ .. بس ادعوا لى ربنا يصلح لى الأمور

على فكرة .. قبل ما أمشى .. أحب أشكر كل أصحابى اللى مهتمين قوى بالرجيم اللى أنا بأعمله وبيسألوا عليا وكمان كل اللى اتطوعوا بالمعلومات الجميلة اللى حكوا لى عنها .. وعلى رأسهم زميلى المذيع المتألق .. أسامة عبدالمقصود .. اللى اهتم جدا انه يدينى نصايح غالية قوى .. وأنا بأدعوه لتدوينها على الصفحة عشان الفايدة تعم على الكل ..وأرجو ان وقته يسمح بكده..  بأشكركم كلكم .. وتصبحوا على خير..

إمم .. هى التفاحة فين ؟؟ 

اليوم الثالث عشر : سمكة واحدة مش كفاية

اليوم الثالث عشر : سمكة واحدة مش كفاية 

             النهاردة .. كان الفطار شبه عادى .. فطار ريجيماوى عادى .. عيش سن و جبنة ملح خفيف وطماطم ...  مفيش فول ولا عيش بلدى طازة مفقع .. ولا حاجة خالص .. كان نفسى يكون أثمن شوية بس معرفتش .. بس أكلت حوالى 5 زيتونات تقريباً .. على فكرة الزيتون مفيد جداً بس كتره فى الرجيم مش حلو قوى عشان بيكون فيه نسبة كبيرة من الملح وكمان دهون الزيتون مش خفيفة .. صحيح هو زيت زيتون بس كتره مش كويس

            ما شربتش النسكافيه النهاردة برضه .. ليه مش عارف بس يمكن عشان نازل من البيت متأخر شوية ؟؟ الله أعلم .. بس ما أعترضتش أصلى شربت منه قبل ما أنام اليوم اللى قبله .. عندى نسكافية مخصوص لقبل النوم .. منزوع الكافيين .. عشان مايسهرنيش بس بيدينى إحساس النسكافيه برضه .. ويمكن ده اللى خلانى ما طلبتوش الصبح .. وقعدت طول النهار على كوباية شاى أحمر وكوباية شاى أخضر .. لغاية ما جه ميعاد الغدا 

             الغدا بقى كان سمك .. كان فاضل عندنا سمكتين من أكله سابقة غضبت عليهم البنوتة ففضلوا محبوسين فى التلاجة لغاية ما قررت أفرج عنهم النهاردة .. وبالمناسبة كان سمك مشوى .. ولما السمك بيكون بايت .. بأحب أكله ساقع .. كتير قوى ها يستغربوا من الموضوع ده بس أنا ما عنديش مشكلة أكله ساقع لوبايت .. فيه ناس ما بتاكلوش بايت أصلا .. بس أنا مش بيفرق معايا .. أصلى بأحب السمك فى كل أحواله .. المهم كانوا سمكتين صغيرين .. مش كبار قوى .. فكرت انى أكل واحدة بس .. واسيب التانية فى الحبس الإنفرادى فى التلاجة .. بس صعبت عليا .. وصعب عليا أفرقهم عن بعض .. وبصراحة كلتها كمان عشان ما كانش فيه غير كده لو مش عاوز ألخبط .. وأخدت جنبهم معلقين رز أبيض بالعدد .. وكانت إرداتى قوية .. على غير العادة .. لما رجعت باقى الطبق وفيه شوية رز ما صعبوش عليا .. 

أمل .؟؟ بيتزا .؟؟ طيب 

المهم لما رحت الشغل اتفاجئت بأمل زميلتنا اللى كانت ابتدت معايا الرجيم أول امبارح .. بعتت جابت بيتزا فى الغدا .. تصدقوا ونعم الرجيم .. ورمت اللوم عليا عشان إتأخرت وما جيتش ع الغدا عشان ناكل سوا .. عموماً مش مهم .. مرة وتعدى .. بس بعد كده هى هاتمشى ع النظام .. دى أمل وأنا عارفها .. لما بتحط مخها فى حاجة بتعملها كما ينبغى .. وبالمناسبة دى أحب أقول لأمل ولكل اللى زيها ما تيأسوش .. مش مهم لو ضعفت أكله أو أكلتين حتى .. ولاحتى لو ضعفت قدام بار سنيكرز أو تويكس .. وبالذات الجديد أبو شوكولاتة بيضا اللى يهبل ده .. مش مهم خالص .. المهم تكمل بعدها كأن مفيش حاجة حصلت .. ويستحسن لو طلبت معاك لخبطة قوى يعنى ان اللخبطة ما تبقاش فى العشا بالذات .. خلوها غدا على أقصى تقدير .. وأكيد ها تقدروا تكملوا .. وربنا يقدرنا كلنا 

لما أكلت السمك بصراحة رغم انهم كانوا صغيرين بس حسيت انهم عملوا لى تخمة .. بقيت مش قادر حتى أشرب مية .. ما كنتش متصور انى هاشبع قوى كده .. ياريتها ما صعبت عليا وكنت رميتها زى الكلبة فى التلاجة .. جنب العسل والطحينة عشان تتأدب .. ما علينا .. المهم انى ما أكلتش حاجة خالص لغاية دلوقتى .. بس ما نسيتش أشرب الشاى الأخضر فى الشغل عشان أحافظ على معدل كوبايتين شاى أخضر فى اليوم زى ما اتفقنا .. صحيح نفسى وزتنى شويتين على بيبسى عشان اهضم .. وقعدت تقنعنى أشربه حتى دايت .. بس أنا مرضيتش .. البيبسى مرفوض تماماً فى الرجيم بتاعى .. طبعا كل واحد منكم حر لو عاوز يشربه .. بس أنا مانعه خالص بكل أشكاله وأنواع المياة الغازية كلها .. 

البلح .. السنة النبوية 

الحاجة اللى حصلت ومش عارف رأيكم فيها إيه انى بعد ما أكلت السمك أخذت 3 تمرات عشان أبقى عملت السنة النبوية الشريفة .. بس مش عارف التمر ده صح انى كنت أكله ولا لأ ؟؟ هو صحيح فيه سعرات حرارية عالية جداً وسكر بنسبة كبيرة قوى .. بس أنا أعتبرته انه ثمرة الفاكهة اللى بتبقى بعد الغدا .. كده أنا صح ولا جلت منى ؟؟ 

أسيبكم بقى عشان  عندى برتقال النهاردة فى العشا وده بياخد وقت وتحضير وشكلى ها جوع قبل ما أكله .. تصبحوا على خير

اليوم الثانى عشر : يوم ممل جداً

 اليوم الثانى عشر: يوم ممل جداً 

            طبعاً العنوان هايشدكم عشان تعرفوا ليه اليوم كان ممل جداً .. والله الأسباب كتير قوى .. حتى لما حاولت أضفى عليه قليل من البهجة .. استعصت  على .. عموما مش مهم .. اهو خلص .. وهاييجى يوم تانى .. وايام تانية .. قد تكون برضة .. أكثر مللاً .. 

المهم .. انا استهبلت شوية فى الفطار النهاردة .. شفتم ازاى انا صريح معاكم .. ما أنا عاهدتكم ع الصراحة .. أصل بأمانة كده ماقدرتش أتجنب انى اكل من الفول الطازة أبو زبدة والعيش البلدى الطازه المقرمش اللى لقيتهم ع الفطار الصبح .. حاولت انى ما أكترش من الأكل .. بس ما كانش فيه غير الجبنة والمربى .. فقلت الفول أهون ..رغم أنى اكلت جبنة بس ما أكلتش مربى .. والحمد لله .. 

ولأن الفطار كان فيه شوية استهبال .. قررت ان الغدا يكون فيه شيئ من القسوة ..  وكل اللى أكلته فى الغدا النهاردة .. كان كوبايتين زبادى (من الحجم العادى والله) .. ومعاهم رغيفين سن ناشف .. بس .. اه والله بس .. وشربت مية كتير و شربت كمان شاى أخضر .. 

طبعاً لما جه ميعاد العشا كنت هاموت م الجوع .. بس قاومت وما أكلتش غير فاكهة .. 

على فكرة .. مش بأنصح حد يعمل زيى كده .. ده نظام ممل جداً 

عن إذنكم بقى النهاردة عشان اليوم كان غلس قوى .. وأنا مش عاوز أغلس عليكم بغلاسته .. تصبحوا على خير 

اليوم الحادى عشر .. بطاطس محمرة ؟؟

اليوم الحادى عشر : بطاطس محمرة ؟؟؟ تنفع ؟؟

            النهاردة لسه بأعانى من الألم اللى شاغل كل فكرى و تفكيرى و أحاسيسى .. وجع رجلى .. ومضطر انى انزل الشغل عشان فيه شغل كتير لازم يتعمل .. وده تاعبنى جدا وضاغط على أعصابى و بيجهد جسمى كله .. صحيح الواحد مش بيحس بنعمة الصحة غير لما بيكون تعبان .. ماحدش بقى بيفتكر لما يكون سليم وماشى عادى كده فى الشارع قد إيه التعب وحش .. الحمد لله على نعمة الصحة .. والحمد لله ان الواحد سليم معافى .. وان دى مجرد وعكة خفيفة وهاتعدى لحالها .. 

           الفطار النهاردة كالعادة .. بس من غير بيض مسلوق ولا فول .. هما شوية جبنة ملح خفيف مع اتنين رغيف سن والطماطم والفلفل الحامى .. ..اه نسيت .. واتنين شريحة صغيرة لانشون .. معلش معلش . ما هو برضه فطار .. وطبعا ما تنسوش مج النسكافيه ..

           اما الغدا بقى فالوجع خلانى اتأخرت فيه جداً .. بصراحة ما كنتش عارف أفكر فى حاجة غير ألم رجلى .. ورغم ان الجوع قرصنى بس ما كانش عندى نفس أكل أى حاجة .. وكنت ناوى لما أروح التليفزيون أطلب طبق خضار سوتية بس .. منه رجيم ومنه أى حاجة تسد وخلاص .. بس اتفاجئت مفاجأة حلوة قوى .. لما لقيت أمل زميلتنا فى القناة بتقول لى انها اتشجعت من اللى بأكتبه انها تعمل رجيم معايا.. صحيح انبسطت جداً من المفاجأة دى .. أصل أمل مش محتاجة رجيم قوى يعنى والموضوع ممكن يجيب معاها نتيجة سريعة بشوية تظبيط فى الأكل .. بس ماشى .. أهو حد بيشجعنى عشان ما أبقاش لوحدى .. 

       

             على فكرة من أساسيات الرجيم الصحيح انك تعمل رجيم فى مجموعة مش لوحدك .. وعشان كده كلنا فى البيت ناويين نكمل مع بعض .. عشان نبقى أسرة مع بعضينا .. "مرجمين" كلنا مع بعض .. أصل لو لوحدك هاتحس انك مضطهد ومتعذب لوحدك وده ها يعمل عندك حالة من التمرد وهاتبطل بسرعة .. وعشان كده .. المشاركة بتجيب نتيجة أفضل خصوصاً لوكانت فى مكان البيت والعمل .. مش بس ع النت . .. لان الواحد طبعاً بيتأثر بكل اللى حواليه .. وكمان ساعتها اليوم الفرى .. اللى وحشنى والله .. بيبقى له طعم تانى

المهم انى لقيتها ما فطرتش من الصبح غير على شوية سلطة .. ومستنية انى أجى عشان نشوف هناكل إيه مع بعض زى ما بيحصل كل يوم لما بنبعت كلنا ناكل مع بعض .. .. المهم أنا فهمتها ان الأساس فى الريجيم بتاعى اننا ناكل كويس فى الفطار .. حاجات رجيم برضه بس لازم تكون وجبة متكاملة .. وشوية فى الغدا ...و نحاول نقلل العشا ع الأخر .. طبعاً فاكرين الحكمة المشهورة

" افطر فطار الملوك .. واتغدى غدا الأمرا .. واتعشى عشا المساكين "

        وطبعاً لانها ما أكلتش من الصبح فرفضت فكرة الخضار السوتيه لوحده .. وفكرنا نبعت نجيب حاجة من كافتيريا التليفزيون عشان تيجى بسرعة خصوصاً ان الوقت بيتأخر .. كانت الساعة 5:30 تقريباً .. فطلبنا كفتة مشوية و خضار سوتيه .. 

 رجعنا تانى للخضار السوتيه .. لكن لما جه الطلب لقينا بدل الخضار السوتيه بطاطس محمرة .. الصراحة هى كانت أفضل منى فى أنها تقريباً ما أكلتش منها خالص .. بس العبد لله بقى ما قدرش .. كانت سخنة و موحوحة ومملحة ومفلفلة .. وبتلعلع فى الطبق قدامى .. ومفيش بديل غير الكفتة لوحدها .. وأكيد ما كنتش هاشبع .. فضربت تلات أرباعها تقريبا .. وكل شوكة أقول لنفسى .. دى أخر واحدة .. دى أخر واحدة .. بس مفيش فايدة .. طفاسة بقى .. بس كانت تستاهل .. 

         المهم لما ضميرى أنبنى قوى ع البطاطس دى قلت أعمل بحث عليها عشان اشوف هيى مفيدة ولا لأ فى الرجيم .. ولقيت ان البطاطس من المأكولات اللى الخبرا بينصحوا بتناولها فى الرجيم .. تخيلوا .. ليه .. لانها بتساعد على الحرق .. هى وكمان البطاطا .. دى فرجت قوى .. ولقيتهم فى الموقع بيقولوا ان البطاطس اللى تخوف فى الرجيم هى اللى بنسميها البوريه .. يعنى اللى عليها لبن وزبدة .. لان ده بيعلى السعرات الحرارية اللى فيها جداً .. لكن فى الحقيقة البطاطس من الأكلات منخفضة السعرات الحرارية و بها قدر من الكاربوهيدارات غير المعقدة .. سريعة الهضم يعنى .. وعشان كده بتساعد على سرعة الإحتراق لباقى الدهون فى الجسم .. تخيلوا وانا كنت فاكر العكس .. 

البطاطس من محفزات حرق الدهون فى الأنظمة الرجيمية

         بصراحة فرحت قوى بالمعلومات دى وخصوصاً ان الكاتب حدد طريقة لتناول البطاطس مهروسة مع قليل من زيت الزيتون البكر النقى و شوية بقدونس مفروم .. وطريقة تانية كمان انك تحط عليها صلصة مش مقدوحة زى ما بنعملها .. ودى بتبقى لذيذة قوى .. بس فرحتى ما تمت لما وصلت لاخر المقالة اللى لقيته كاتب فيه وبالخط الأحمر العريض

 

" إبتعد عن البطاطس المقلية بأي حال من الأحوال."

 كده وأنا كان عاجبنى كلامك من شوية؟ .. طب أعمل إيه أنا بقى دلوقتى؟ .. ومسطرها كمان؟ .. طيب حاضر ياسيدى .. توبة .. مرة وعدت .. وطبعاً لانى واكل متأخر .. قررت انى أكل زبادى بس فى العشا .. او يمكن ثمرة فاكهة بس .. زى كل يوم .. والحمد لله على كده قوى .. 

 

           ربنا يسهل بقى وألاقى كتير من صحابى بيشاركونى الرجيم كده زى أمل .. على فكرة هى ما كانتش أول واحدة تقول لى كده .. عندى كذا حد من صحابى أخد الخطوة وقال لى انه هايعمل كده بعد كلامى عن النظام بتاعى .. ودى حاجة فرحتنى قوى .. بس السؤال اللى بسأله .. هل هاييجى لحد الشجاعة الكافية انه يحكى لنا عن تجربته زى ما أنا بأعمل كده ؟؟.. هانشوف .. تصبحوا على خير